भांगरभूंय | प्रतिनिधी
गोवा शिपयार्डा मुखा वेलो रस्तो नेमपाचे स्थितींत
मुरगांव: गोवा शिपयार्डा सामकार राष्ट्रीय म्हामार्गार भुंयगटार वाहिनीची दुरुस्ती करतना सिवरेज कॉर्पोरेशनान सकयल्या दर्जाचें काम केल्ल्यान मुखेल रस्तो नेमपाचे स्थितींत आसा. जर रस्तो नेमलो जाल्यार वास्को शारांतली येरादारी पुरायपणान ठप्प जातली. राष्ट्रीय म्हामार्ग प्राधिकरणान ह्याच वर्सा रस्त्यार हॉटमिक्स डांबरीकरण केल्लें. पूण सिवरेज कॉर्पोरेशनान भुंयगटार वाहिनीचें काम निश्काळजीपणान केल्ल्यान रस्तो एके वटेन नेमला. हाका लागून भौशीक बांदकाम रस्तो विभागाक खूबशे फावटी डांबर घालचें पडलां. पूण रस्तो नेमतूच राविल्ल्यान निमाणें सिवरेज कॉर्पोरेशनान रस्तो खणून, भुंयगटार वाहिनीचें काम हातांत घेतलां.
रस्तो खणिल्ल्यान हाचो फटको गोंयांत सुरू आशिल्ल्या राष्ट्रीय खेळां सर्तीच्या बायलांच्या फुटबॉल मॅचींक जावंक लागला. ह्या रस्त्या वेल्यान व्हड प्रमाणांत येरादारी आसता. तशेंच वास्को शारांत वचपाचो हो मुखेल रस्तो आशिल्ल्यान येरादारीची कोंयडी जाता.
दक्षीण गोंय जिल्होधिकारी कचेरेंतल्यान आदेश जारी करून गोंयांत राष्ट्रीय खेळां सर्ती सुरू आशिल्ल्यान रस्त्यार खणपाच्या कामाक बंदी घाल्ली. पूण सिवरेज कॉर्पोरेशनान दक्षीण गोंय जिल्होधिकारी कचेरेच्या आदेशाक पाळो दिनासतना गोवा शिपयार्डा मुखा वेलो रस्तो खणून गुन्यांव केला.
तशेंच रस्तो खणिल्ले वटेन शिपयार्डांत कामाक येवपी कामगार आपलीं वाहनां रस्त्यारूच पार्क करून वचत आशिल्ल्यान येरादारीचे कोंयडेंत आनीक भर पडल्या. येरादारी पुलीस राष्ट्रीय खेळां सर्तींतल्या चिखली आनी टिळक मैदानार ड्युटीर आसात. हाका लागून येरादारी पुलिसांक अतिरिक्त पुलिसांक गोवा शिपयार्डा मुखा वेले येरादारीचेर नियंत्रण दवरपा खातीर आपोवचें पडटा.
ह्या भुंयगटार वाहिनीच्या दुरुस्तीचें कांसवा गतीन काम सुरू आसा. हाका लागून हें काम पुराय जावपा खातीर आनीक तीन सप्तकां तरी लागतलीं अशें दिसून येता. जर ह्या रस्त्याचें काम झुजा पांवड्यार जालें ना जाल्यार शारांतली अवजड वाहनां आनी गोवा शिपयार्डांत येवपी अवजड वाहनांक लागून एके वटेनचो रस्तो नेमतलो. रस्त्याचें काम कांसवा गतीन जायत आशिल्ल्यान येरादारी पुलिसांक येरादारीचेर नियंत्रण दवरतना खूब त्रास जातात.
वास्को येरादारी पुलिसांनी शिपयार्डा मुखा वेलें रस्त्याचें काम पुराय जाय मेरेन शारांतल्यान अवजड वाहनांक बंदी घालची. कारण शिपयार्डा मुखे वेलो रस्तो खणिल्ल्यान रस्तो एके वटेन नेमूक लागला. जर भुंयगटार वाहिनीचें काम बेगीन जालें ना जाल्यार व्हड दुर्घटणा जावपाची शक्यताय राष्ट्रीय म्हामार्ग प्राधिकरणांच्या एका वरिश्ठ अधिकाऱ्यान उक्तायली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
