भांगरभूंय | प्रतिनिधी
बोरयेकार आक्रमक, अधिकारी सुनावणेक येवंकूच ना
पणजी, प्रतिनिधी : बोरी पुलाक थळाव्या लोकांचो खर विरोध आसा. पूल उबारपाक खूब पर्यायी जागे आसात. घरां मोडून, शेतां पुरोवन आमकां पूल नाका, अशी आक्रमक भुमिका बोरयेच्या लोकांनी घेतल्या. मजगती, आयज जमीन संपादना विशींची सुनावणी आशिल्ली. पूण अधिकारी दनपरां मेरेन येवंक नाशिल्ल्यान ती जावंक ना. भोशीक बांदकाम कार्यालयांत जमिल्ल्या लोकांनी घरां आनी शेती वाटावन पूल बांदचो, अशी मागणी पत्रकारां सामकार केली. जमीन धनयांक कांय दिसां पयलीं नोटिसो धाडून सुनावणेक आपयिल्ले.
मंगळारा सकाळी सुनावणे खातीर सगले 19 जमीन धनी आयिल्ले. तरी दनपारा मेरेन सुनावणी जावंक नासले कारणान तांची निरशेवणी जाली.
नुवेचे आमदार तशेच पर्यावरण मंत्री आलेक्स सिक्वेरा हांणी सोमारा हांगाच्या लोकांची बसका घेतिल्ली. लोकांची शेतां पुरोवन आनी घरा मोडून पुल बांदपाक म्हजोय विरोध आसा. हांव लोकां बरोबर आसा. भौशिक बांधकाम अधिकाऱ्यां वांगडा परत बसका जातली. घरां आनी शेतां वाटावपाचो येत्न आसा, अशें मंत्री सिक्वेरा हांणी स्पश्ट केलां.
मजगतीं, लोकांचो विरोध आसलो तरी पुलाच्या बांदकामा खातीर लागपी जमनीच्या संपादनाची प्रक्रिया सुरू जाल्या, अशें कांय लोकांनी सांगलें. ताका लागून लोकां मदीं घरां मोडटले, अशी भिरांत पातळ्ळ्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
