भांगरभूंय | प्रतिनिधी
राज्यपालांच्या 200 व्या पुस्तकाचें प्रकाशन
पणजी: व्हड रुखांक ल्हान स्वरुपांत हाडपाची बोन्साय कला ही जपान वा चीन ह्या देशांनी तयार जाली असो समज आसा. पूण ही कला 5 हजार वर्सां पयलीं भारतांत तयार जाल्ली अशें मत उपराष्ट्रपती जगदीप धनखड हांणी उक्तायलें.
बिरेस्तारा राज्यपाल श्रीधरन पिल्लई हांच्या ‘वामन वृक्ष कला’ ह्या पुस्तकाच्या प्रकाशन सुवाळ्यांत ते उलयताले. ह्या वेळार माचयेर मुख्यमंत्री डॉ. प्रमोद सावंत, ज्ञानपीठ पुरस्कार जैतिवंत दामोदर मावजो हाजीर आशिल्ले.
धनखड हांणी म्हणलें, राज्यपालांच्या ह्या 200 व्या पुस्तकांतल्यान बोन्साय कला ही मुळची भारतीय आसा हे पुराव्या निशीं सिद्ध जालां. आमी खूबशा गजालीं कडेन एका थारावीक दृश्टीकोनांतल्यान पळयत आसतात. पूण हाका आमी आपले मूळ, आमचो इतिहास विसरून वतात. आयुर्वेदांतल्या कांय तथ्य आधुनीक वैद्यकशास्त्राक देखील आश्चर्यचकीत करतात. पिल्लई हांणी आपल्या पुस्तकांतल्यान तथ्य मांडिल्ल्यान हांव तांचें अभिनंदन करता.
आमी सगल्यांनी धर्तरे वेल्या हेर जिवांक वाटावपाचो सोपूत घेवंक जाय. धरतरी फक्त मनशांचीच न्हय. मनशांक लागून धरतरीची आनी ताचे वयल्या हेर जिवांचें लुकसाण करप योग्य न्हय. आमी तांचें विश्वस्त जावन रावंक जाय. सैमीक संसाधनांचो समतोल वापर जायत जाल्यारूच ही पुराय धर्ती तशेंच हें सुंदर गोंय तिगून उरतले अशें मत धनखड हांणी उक्तायलें.
मुख्यमंत्री डॉ. सावंत हांणी सांगलें की, राज्यपालांनी 1985 वर्सा पयलें पुस्तक बरयिल्लें. उपरांत तांचो साहित्यीक प्रवास फुलत गेलो. आतां मेरेन तांणी 130 मल्याळम जाल्यार 70 इंग्लीश भाशेंत पुस्तकां बरयल्यांत. तांचे सारको साहित्यीक राज्यपाल म्हूण मेळप ही गोंयकारां खातीर अभिमानाची गजाल. तांच्या मार्गदर्शनाची गोंयाक खूब गरज आसा.
समाज हीच म्हजी प्रेरणा
म्हज्या साहित्याची प्रेरणा ही समाज आसा. हांव सामान्य लोकां मदीं वतां, तांचे कडेन चर्चा करतां. लेखणींतल्यान समाजाक कितेंय वेगळें दिवंक शकता काय कितें हाचोय विचार हांव करतां. हातूंतल्यानूच म्हज्या साहित्याची निर्मिती जाता अशें राज्यपाल श्रीधरन पिल्लई हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
