बेळगांवां वतात, सांबाळून!!
भांगरभूंय | प्रतिनिधी
चोर्ला रस्त्याचेर फोंडकुलांच फोंडकुलां
वाळपय, प्रतिनिधी : चवथ लागीं पावल्या. ताका लागून गोंयकार व्हडा प्रमाणांत खरेदी करपा खातीर बेळगांवां वतात. पूण चोर्ला रस्त्या वेल्यान जर तुमी वतात जातल्यार सावधान! हो रस्तो फोंडकुलांनी भरिल्लो आसा. हाका लागून टायर फुटपाची शक्यताय आसा. देखून वतना सादूर रावप खूब गरजेचें. फाटल्या तीन म्हयन्यां सावन ह्या रस्त्याची अवस्था सामकीच बाबत जाल्या.
रस्त्याचेर फोंडकुलांचें जाळें तयार जालां. तातूंत माती वा फातर भरप गरजेचें आसा. पूण हाचे कडेन आडनदर करतात. ताका लागून गोंयकारांक अंदूं बेळगांवां बाजारांत वचपाक मन येवचें ना. अशें जालें जाल्यार बेळगांवां बाजाराचेर हाचो व्हड परिणाम जावंक शकता. देखून चवथी पयलीं येरादारी खातीर रस्तो सुळसुळीत करप खूब गरजेचें.
हे विशीं जायत्या पांवड्यार मागणी जाल्ली. पूण कर्नाटक सरकार हाचेर खासा लक्ष दिना हें स्पश्ट जाता. हाका लागून कर्नाटकांतल्या नागरिकांनी तिडक उक्तायल्या.
कर्नाटक सरकार ह्या वाठारांतल्या रस्त्यां कडेन आडनदर केल्ल्याचो आरोप कुणकंबी ,चोर्ला आनी हेर गांवांतल्या नागरिकांनी केला. ह्या वाठारांतल्या आमदारांनी हाचेर खासा लक्ष दिवचें. रस्तो इबाडिल्ल्यान वेवसायाचेर परिणाम जाता. गोंयांतल्यान येवपी येरादारी थांबयल्यार ह्या वाठाराचे उदरगतीचेर वायट परिणाम जावंक शकता. हाका लागून सरकारान हाचेर खासा लक्ष दिवपाची मागणी लोकांनी केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
