भांगरभूंय | प्रतिनिधी
फोंडें, प्रतिनिधी: बायथाखोल – बोरये आयतारा रातच्या सुमार ८ वरांचेर एके गाडयेन स्कुटरीक धपको दिल्ल्यान वेलिंगचे विशाल गावडे आनी जयेश गावडे हे दोगूय जखमी जाले. ह्या अपघाता उपरांत कार चालकान थंयच्या पळ काडलो. जखमी जाल्ल्यांक उपाचारा खातीर जीएमसींत दाखल केल्यात. फोंडें पुलीस अपघात करून पळून गेल्ले गाडयेचो सोद घेतात. मजगतीं, दयानंदनगर-धारबांदाड्यां तीन ट्रकां मदीं जाल्ल्या अपघातांत दोग ट्रक ड्रायव्हर जखमी जाले.
आयतारा रातचे शिरोडेंच्यान वेलंगां जीए -०५- क्यू- ३५६२ क्रमांकाची दोनचाकी घेवन वतना बायथाखोला विरुद्ध दिकेन येवपी एके गाडयेन तांकां धपको दिलो. उपरांत गाडयेचो ड्रायव्हर थंयच्यान गाडी घेवन पळून गेलो. परांत जखमी जाल्ल्या दोगूय तरणाट्यांक १०८ रुग्णवाहिकेंतल्यान व्हरून उपजिल्हो हॉस्पिटलांत दाखल केले. सहाय्यक उपनिरीक्षक रोहिदास भोमकार हांणी अपघाताचो पंचनामो केलो.
तीन ट्रकां मदीं अपघात
दयानंदनगर- धारबांदोड्या आयतारा १ वरांचेर जीए- ०८- झेड -९३६३ क्रमांकाचो माल व्हरपी ट्रक तेच वटेन वचपी केए -३२-डी-०१६१ क्रमांकाच्या कॉंक्रीटवाहू ट्रकाक ओव्हरटेक करतना विरुद्ध दिकेन येवपी केए -२९-सी-०६५७ क्रमांकाच्या ट्रकाक धपको दिलो. तिनूय वाहनांचे बरेंच लुकसाण जालें. दोन ट्रकांचे चालक जखमी जाले. फोंडें पुलीस स्टेशनाचे सहाय्यक उपनिरीक्षक सुधार गांवकार हांणी पंचनामो केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
