बाणस्तारी अपघात : बळी आनी जखमीं खातीर २ कोटी रुपया दिवपाचें मेघनान केलां मान्य
भांगरभूंय | प्रतिनिधी
पणजी, प्रतिनिधी : बाणस्तारी अपघातांत मरण आयिल्ल्यांच्या कुटुंबाक आनी जखमींक खर्चा खातीर २ कोटी रुपया दिवपाचें मेघना सिनाय सांवड्डेंकार हाणें मान्य केलां. २ सप्तकां भितर ही रक्कम न्यायालयांत जमा करपाचो निर्देश मुंबय उच्च न्यायालयाच्या गोंय खंडपिठान जारी केला. पूण हे रकमेचो मूळ भरपायेचे रकमेचेर जो निर्णय जातलो, ताचेर कांयच परिणाम जावचो ना, अशेंय न्यायालयान स्पश्ट केलें.
बाणस्तारी मर्सडीस गाडयेचो धपको बसून ६ ऑगस्टाक भिरांकूळ अपघात जाल्लो. ह्या अपघातांत सुरेश फडते, भावना फडते आनी अरुप करमाकर हांकां मरण आयिल्लें. जाल्यार वनिता भंडारी, शंकर हळर्णकार, राज माजगांवकार हीं जखमी जाल्लीं. तांचेर गोमेकोंत उपचार चलतात. हे संबंदी पुलिसांनी १० वेर वैजकी तपासणी आनी चवकशे खातीरची नोटीस मेघना हिका दिल्ली. हाका मेघनान गोंय खंडपिठांत आव्हान दिलां. हाचेर बुधवारा सुनावणी जाली.
ह्या वेळार मेघना हांणी स्वता जावन २ कोटी रुपया दिवपाचें मान्य केलां. हांतले ५० लाख रुपया फडते कुटूंब आनी ५० लाख रुपया अरुप करमाकार हांच्या कुटुंबाक दितले. तशींच जखमी जाल्ल्यांक दरेकी २५ लाख रुपया दितले. पूण लुकसाण भरपाये संबंदी न्यायालयांत केस आसा. तिचो हे रक्कमे कडेन कांयच संबंद ना अशें न्यायालयान स्पश्ट केलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
