बाजीगर जालो 30 वर्सांचो
भांगरभूंय | प्रतिनिधी
230 कोटी रुपयांची केल्ली जोड
बाजीगर हो सिनेमा प्रदर्शीत जाल्ल्याक आयज 30 वर्सां जालीं. शाहरुख खान, काजोल आनी शिल्पा शेट्टी हांणी मुखेल भुमिका केल्लो हो चित्रपट 12 नोव्हेंबर 1993 दिसा प्रदर्शीत जालो. फिल्माच्या 30व्या वर्धापन दिसा काजोलान फिल्मा कडेन संबंदीत आपलो अणभव सांगला. ताणें बाजीगर ह्या सिनेमा संबंदीत कांय चित्रां एक्स प्लॅटफॉर्माचेर (पयलीं ट्विटर) शेअर केल्यांत.
हाचे वांगडाच ताणें बरयलां की, बाजीगर सिनेमाक 30 वर्सां पुराय जाल्यात. ह्या सिनेमांतल्यान सरोज खान हांकां हांव पयलेच खेपे मेळ्ळे. शाहरुख खानाक, अनु मलिकाक पयलेच खेपे मेळ्ळें. हो सिनेमा करतना हांव फकत 17 वर्सांचें आशिल्लें.
काजोलान फुडें बरयलां, अब्बास भाई आनी मस्तान भाई (दिग्दर्शक) म्हाका सेटांचेर आपल्या भुरग्या प्रमाण वागयताले. जॉनी लीव्हर आनी शिल्पाक हांव कशें विसरूं. यादींचो व्हडलोसो पोटलो आनी केन्नाच सोंपनाशिल्लो हांसो. आयज मेरेन जेन्ना जेन्ना ह्या फिल्मांतलीं गितां वा संवाद आयकतां तेन्ना- तेन्ना तोंडार सदांच मुमुरखो हांसो येता.
230 कोटींची जोड
12 नोव्हेंबर 1993 दिसा प्रदर्शीत जाल्ल्या बाजीगराची 230 कोटी रुपयांची जोड जाल्ली. अब्बास- मस्तान हांणी दिग्दर्शीत केल्लो हो चित्रपट शाहरुख- काजोलाचो एकठांय केल्लो पयलो चित्रपट. ह्या सिनेमांत न्हयकारात्मक भुमिका करपी शाहरुख खान रातोरात स्टार जालो आनी ताका बेस्ट एक्टर पुरस्कारय मेळिल्लो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
