भांगरभूंय | प्रतिनिधी
भांगरभूंय । प्रतिनिधी
वाळपयः सत्तरी तालुक्यांतल्या बांबर हांगा विष्णू जोशी हाच्या जमनीत मेळल्ल्या पोरण्या नाण्यां संबंदी विशेश तपास आनी अभ्यास करतले. ते खातीर ती पुरातत्व खात्यान आपल्या ताब्यांत घेतल्यांत अशे पुरातत्व खात्याचो मंत्री सुभाष फळदेसाय हाणे सांगलें. विष्णू जोशी हाच्या जमनींत सुमार 800 नाणी मेळतगीर फळदेसाय आनी पुरातत्व खात्याचो संचालक आनी हेर अधिकाऱ्यांनी तागेर वचून पळोवणी केली.
विष्णू जोशी आपली जमीन नितळ करतना ताका एके कडेन मडक्यांत दवोरल्लीं नाणी मेळ्ळी. ताणे हेर लोकांक ताची म्हायती दिवन नाणी घरा हाडली. ती नितळ करून पळयल्या उपरांत ती दुर्मिळ स्वरुपाची आशिल्ल्याचें स्पश्ट जालें. ती मध्यम युगीत तेपावली आसतलीं असो अदमास आसा. सुभाष फळदेसाय आनी पुरातत्व खात्याच्या अधिकाऱ्यांनी विष्णू जोशी हाचे कडेन चर्चा केली. ही नाणी खंयच्या तेपा वयलीं ताचो अभ्यास करतले अशें ताणे पत्रकारांक सांगलें.
नाणी पोर्तुगेज तेपांतलीं
बांबर हांगा मेळल्लीं नाणी पोर्तुगेज तेपा वयलीं आसपाक जाय अशें इतिहास अभ्यासक राजेंद्र केरकार हाणे सांगले. पुरातत्व खातें ताचेर चड उजवाड घालपाक शकतले. नाणी मेळ्यांत अशी खबर मेळतगीर केरकारान घडणुकेचे सुवातेर वचून तांची पळोवणी केली. इंडो- पोर्तुगेज तेपार वेपार आनी उद्देगाचे नदरेन सत्तरी व्हो म्हत्वाचो प्रदेश आशिल्लो. ब्रिटीश इंडिया आनी पोर्तुगीज इंडिया हाचे शीमे वयलो व्हो प्रदेश आशिल्लो. शिवाय त्या काळांत चांदसूर्य घाटा वयल्यान येरादारी चलताली. ताका लागून पोर्तुगेज तेपा वयलीं हीं नाणी आसपाक जाय अशें म्हजो अदमास आसा. गोंयांत जायत्यो राजवटी जावंन गेल्यो. ताचे पुरावे सामकार येतात. सत्तरीत मेळल्ल्या नाण्यांक लागून हें परत एक फावट सिद्ध जालां अशें केरकारान सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
