भांगरभूंय | प्रतिनिधी
फोंडें, प्रतीनिधी: फोंडें अर्बन को- ऑपरेटिव्ह सोसायटीं फाटल्या कांय वर्सांनी व्हड घोटाळो उक्ताडार आयल्या उपरांत सहकार निबंधकांनी संचालक मंडळ बरखास्त करून प्रशासकीय समितीची नियुक्ती केल्या. पूण बरखास्त केल्लें संचालक मंडळ प्रशासकीय समितीकडेन ताबो दिवपाक तयार ना अशी म्हायती अध्यक्ष ऍड. आर.एस. नायक हांणी आयज घेतिल्ले पत्रकार परिशदेंत दिली.
बरखास्त केल्ल्या संचालक मंडळान खुबशे घोटाळे केल्ल्याचे २०२१-२२ वर्साच्या लेखा तपासणेच्या अहवालांत स्पश्ट जालां. तांतल्या कांय वांगड्यांनी संचालक मंडळा आड सहकार निंबधकाकडेन कागाळी केल्ल्यो. संचालक मंडळान बेपर्वापणान काम केल्ल्यान पत संस्थेची परिस्थिती सध्या वायट जाल्या. पत संस्था तिगोवन दवरपा खातीर ता. २९ नोव्हेंबराक जावपे संचालक मंडळाचे वेंचणुकेंत नवे संचालक वेंचून येवप गरजेचें अशें ऍड. नायक हांणी सांगलें.
फोंडें मतदार संघांचे आदले आमदार तशेंच मंत्री रवी नायक हांचे संकल्पनेंतल्यान साकारिल्ले पत संस्थेची फाटल्या ४-५ वर्सांनी स्थिती सामकी वायट जाल्या. ही स्थिती वायट आसतना संचालक मंडळान रीण घेतिल्ल्या कडल्यान वसुली करपाचेर लक्ष दिवंक ना. मात व्हडा प्रमाणांत रीण दिवपाची मोहीम सुरू केल्ली. ताचो फटको सध्या पत संस्थेला बसला अशें तांणी फुडें म्हणलें.
हे पत्रकार परिशदेंत गुरूदास नायक, संदीपता नायक, ब्राह्मनंद नायक आनी जना नायक हाजीर आशिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
