भांगरभूंय | प्रतिनिधी
पणजी, प्रतिनिधी: लोकांच्या खर विरोधाक भियेवन आनी लोकांची सत्ता सर्वोच्च आसा हें जाणून घेवन मुख्यमंत्री डॉ. प्रमोद सावंत हांणी न्हंय येरादारी खात्याक फेरीबोटीच्या तिकीटांच्या दरांत वाड फाटीं घेवपाची सुचोवणी केल्या. ताका लागून गोंय आनी गोंयकारां खातीर झगडपी कॉंग्रेस पक्षाच्या सगळ्या कार्यकर्त्यांक हांव परबीं दितां, अशें विरोधी पक्षाचे फुडारी युरी आलेमाव हांणी सांगलें.
गोंयच्या भाजपा सरकारान आपल्या लोक विरोधी निर्णयांनी सामान्य लोकांचें शोशण करपाचो यत्न केला. भाजपा सरकार सदांच बेजबाबदार धोरणां वरवीं उपेक्षीत क्षेत्राक लक्ष्य करता, असो आरोप युरी आलेमाव हांणी केला.
भाजपा सरकाराचें गरीब विरोधी आनी गिरेस्तांच्या फायद्याचीं धोरणां जनतेक समजल्यांत. ह्या म्हयन्यांत आनी २०२४ वर्सा वेंचणूक जावपी राज्यांनी भाजपा सरकाराक केंद्रांतल्यान काडपा खातीर लोक कमळाच्या आड मतदान करतले असो दावो आलेमांव हांणी केला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
