भांगरभूंय | प्रतिनिधी
कोयर वेवस्थापन नाशिल्लें हजारे चिकन सेंटर बंद करपाची प्रक्रिया सुरू
मडगांव, प्रतिनिधी ः राय गांवांत चिकनाचो कोयर उडोवपाच्या प्रकरणांत मायणा कुडटरी पुलिसांनी जावेद अहमद (फातोड्डें) हाका अटक केल्या. ते उपरांत रायच्या कोयर वेवस्थापन नाशिल्ल्या हजारे चिकन सेंटर बंद करपाची प्रक्रिया सुरू केल्या.
कुडटरींतल्या कोयराच्या समस्याचेर उपाय करतना रस्त्या कुशीक कोयर उडोवपी लोकांचेर कारवाय सुरू आसा. कोयर रस्त्या कुशीक उडयल्या उपरांत कोयर उखलपाची जापसालदारकी पंचायतीचेर येता. हाचे आदीं कुडतरींत कोयर उडयतना तिगांक धरले आनी कोयर उखलपाक सांगून दंडात्मक कारवाय केल्ली.
मेळिल्ले म्हायती प्रमाण, कुर्रा- रायचो दुबावीत जावेद अहमद हाका चिकनाचो कोयर उडयतना धरलो. ते उपरांत थळाव्या लोकांनी मायणा- कुडटरी पुलिसांक रस्त्या कुशीक कोयर उडोवपा विशीं म्हायती दिली आनी दुबावितां आड फुडली कारवाय करपाक सांगलें. दंडात्मक कारवाय केल्या उपरांत लेगीत कोयर उडोवपी व्यक्तींचेर कसलोच निर्बंध ना. ते खातीर मायणा पुलिसांनी अहमद हाका प्रतिबंधात्मक अटक केली. ते भायर ज्या चिकन सेंटराचो हो कोयर आसलो ताची चवकशी केल्या उपरांत चिकनाच्या कोयराची वेवस्थापन करपाची पद्दत थंय नाशिल्ली. ते खातीर अशी घडणूक परतून घडची न्हय हे खातीर पुलिसांनी हजारे चिकन सेंटर बंद करपाचो निर्णय घेतला आनी हे संबंदी कारवाय सुरू केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
