भांगरभूंय | प्रतिनिधी
म्हापशें, प्रतिनिधी : गिरी राष्ट्रीय महामार्गाचेर जाल्ल्या हीट अँड रन अपघाताच्या प्रकरणांत दुबावीत अॅड. मिलिंद नायक देसाय हे सोरो पियेवन गाडी चलयताले अशें तपासणेंत समजलां. ताका लागून म्हापशें पुलिसांनी तांचे आड गुन्यांवांतलीं कलमां वाडयल्यांत.
ह्या अपघाताच्या दुसर्या दिसा अॅड. देसाय हांची पुलिसांनी जिल्हो हॉस्पिटलांत तपासणी करून घेतिल्ली. हे तपासणेचो अहवाल सकारात्मक आयला. हॉस्पिटलाच्या पॅथॉलॉजी विभागान दिल्ल्या अहवालाच्या आदारान पुलिसांनी नायक देसाय हांचे खून आनी पुरावे नश्ट करपाचीं कलमां जोडल्यांत. ह्यान पयलीं मोटारवाहन कायद्या खाला गुन्यांव नोंद केल्लो, अशी म्हायती उपअधीक्षक जिवबा दळवी हांणी दिली.
मजगतीं, हो अपघात १५ ऑक्टोबराक रातच्या ११.३० च्या सुमाराक जाल्लो. गाडयेचो धपको स्कुटरी बशिल्ल्यान प्रदीप नार्वेंकार (६२, रा. वांसिओवाडा, गिरी) हे गंभीर जखमी जाल्ले. उपचारा मजगतीं तांकां मरण आयिल्लें. ते म्हापशेंच्या साई संतोष ज्यूस सेंटर ह्या कोल्ड्रिंक्स आस्थापनाचें धनी आशिल्ले. अपघाता उपरांत दुबावीत गाडी घेवन थंयच्यान पळून गेल्लो. अपघात पळोवप्यांनी दिल्ले म्हायतीचे मजतीन म्हापशें पुलिसांनी दुबावीताचे गाडयेचो सोद घेतलो. १६ ऑक्टोबराक ताका अटक केली. आयटेन कारूय जप्त केली.
मजगतीं, पुलिसांनी म्हापशें न्यायालयाक पत्र धाडून दुबावीत वेवसायान वकील आशिल्ल्यान ताका तांणे केल्ली कृती खबर आशिल्ल्याची म्हायती दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
