पोरस्कडें- धारगळ रस्त्यार सिग्नल बसोवपाच्या कामाक सुरवात
भांगरभूंय | प्रतिनिधी
पेडणें, प्रतिनिधी: बांदकाम खातें NH 66 चे अभियंते कार्यतत्पर आसाच. तांकां लोकप्रतिनिधींनी, आमदार, जिल्हो पंचायत वांगडी, सरपंच आनी पंच हांचे वांगडा भौशीक समस्या सोडोवपा खातीर वावुरपी NGO’S नी साथ दिवची आनी काम करून घेवचें, अशें मत पेडणें तालुको विकास समितीचे निमंत्रक व्यंकटेश नायक हांणी मांडलें.
अधिकारी लोकप्रतिनिधींनी केल्ल्या कामाची तोखणाय करची आनी समाजान व्हडल्या मनान शाबासकी दिवन तांची उमेद वाडोवची, अशें तांणी फुडें म्हणलें.
फुडाराक लोकांचे जीव वाटावपाक आनी वाहनांचें लुकसाण थांबोवपाक उपाय काडपाच मागणी व्यंकटेश नायक हांणी केली.
पोरस्कडें पंचायती मुखारच्यान ते न्हंयबाग- भटपावणी मेरेन ओव्हर ब्रिज करप हो एकूच उपाय.
पोरस्कडें- अमेरे- न्हंयबाग पंचायतीन ग्रामसभेंत अशे थाराव पास करून सरकारा कडेन फाटपुरवण करची, अशें मत नायक हांणी उक्तायलें.
अपघात जावचे न्हय देखून भौशीक बांदकाम खात्याच्या अधिकार्यांनी रोखडेच उपाय केल्ले खातीर भौशीक हमरस्तो ६६ विभाग कोलवाळ हांकां परबीं आनी आमदार प्रवीण आर्लेकार हांचे उपकार तांणी मानले.
मजगतीं, पोरस्कडें- न्हंयबाग जंक्शनाची पळोवणी थळावे आमदार प्रवीण आर्लेकार, अधिकारी आनी थळाव्या पंचायत मंडळाचे हाजेरींत केल्ली. २० तारखेर पळोवणी करतना आमदार प्रवीण आर्लेकार हांणी अधिकार्यांक ह्या जंक्शनाचेर सिग्नल बसोवचें. तशेंच २४ वरां ट्रॅफीक पुलीस तैनात करपाची सुचवणी केल्ली. तशेंच आमदार प्रवीण आर्लेकार हांणी पत्रकारां कडेन उलयतना, ह्या सिग्नला संबंदी आपणें मुख्यमंत्र्यां कडेन चर्चा केल्या. ते प्रमाण आमदार प्रवीण आर्लेकार हांणी रस्त्याची पळोवणी केल्या उपरांत सांजेवेळार मेरेन हांगा सिग्नल बसोवपाचें काम राष्ट्रीय महामार्गांच्या अधिकार्यांनीं रोखडेंच केलें. राष्ट्रीय महामार्ग ६६ चें काम पत्रादेवी ते धारगळ मेरेन एम व्ही आर कंपनी करता. मात कंत्राटदारांच्या मनमानीक लागून जमीन संपादन करपाक कळाव लागलो. ताका लागून रस्ते करतना आडखळी निर्माण जातात. सरकारान पयलीं राष्ट्रीय महामार्गा वांगडा गांवांगांवांत जोडपी सर्वीस रस्ते आनी ताचे खातीर लागपी जमीन संपादीत करप गरजेचें आशिल्लें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
