भांगरभूंय | प्रतिनिधी
शुल्कांत सवलत दिवपी अधिसुचोवणी जारी
पणजी : सरकारान 15 वर्सां परस चड पिरायेचीं वाहनां कावलांत (स्क्रॅप) काडपाचें धोरण जाहीर केले उपरांत आतां कावलांत काडपी वाहन धनयांक सवलत जाहीर केल्या. हाका लागून पोरणें वाहन कावलांत काडप लावकारी थारतलें.
लावाचे दोन पर्याय उपलब्ध आसात. हे विशींची अधिसुचोवणी येरादारी खात्यान जारी केल्या. पोरणें वाहन कावलांत काडून नवें वाहन खरेदी केले उपरांत शुल्कांत 15 ते 25 टकक्यां मेरेन सवलत मेळटली. शुल्कांत सवलत नाका जाल्यार वाहनाचें जें मोल थारतलें, तातुतलीं 50 टक्के रक्कम मेळटली. शुल्काची रक्कम उणी आसली जाल्यार शुल्काची रक्कम मेळटली. गाडयेचें मोल शुल्का परस उणें आसलें जाल्यार गाडयेच्या मोलाच्या रकमेचो लाव मेळटलो. भौशीक येरादारी वाहना खातीर शुल्कांत 8 वर्सां मेरेन सवलत मेळटली. हेर वाहनां खातीर 15 वर्सां मेरेन सवलत मेळटली. वाहन कावलाक दिले उपरांत धनयांक प्रमाणपत्र दितले.
गोंय सरकारान वाहन कावलांत काडप धोरणाची अधिसुचोवणी 10 मेक जारी केल्ली. धोरणाची कार्यवाही करपा खातीर एजन्सींची नेमणूक जातली. अजून मेरेन एजन्सीची नेमणूक जारी जावंक ना. तरी लेगीत येरादारी खात्यान वाहन कावलांत काडले जाल्यार धनयाक कितलो लाव मेळटलो, ताची अधिसुचोवणी जारी केल्या.
पुराय देशांत 1.2 कोटी पोरणीं वाहनां कावलांत येवपाची शक्यताय आसा. राज्यांतली 1 लाख 92 हजार वाहनां 15 वर्सां पयलींचीं आसात. फुडल्या 5 वर्सांत हातूंत 3.5 लाख वाहनांचीं भर पडटली, असो अदमास येरादारी खात्याचो आसा.
पोरण्यां वाहनांक पॅत्रोल चड लागता. तशेंच प्रदुशणाचें प्रमाण उणें करून नव्या तंत्रज्ञानाच्या वाहनांचो वापर वाडचो हो हेत कावल धोरण जाहीर करपा फाटल्यान आसा. इलेक्ट्रीक गाडयांचो वापर ल्हवू ल्हवू वाडत आसा. इलेक्ट्रीक गाडयांचें प्रमाण वाडलें जाल्यार पॅत्रोलाचो वापर आपशीच उणो जावपाक लागतलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
