भांगरभूंय | प्रतिनिधी
मेळत थंय वाहनां करतात पार्क; येरादारी पुलिसांची आडनदर
पेडणें: पेडणें शारांत कदंब बस स्टॅण्डाच्या तळमाळ्यार पार्किंगेची वेवस्था आसून लेगीत कांय वाहन चालक रस्त्याच्या दोनूय वटांनी पार्कींग करीत आशिल्ल्यान येरादारीची कोंयडी जाता. हाचेर सरकारान आनी पेडणें येरादारी पुलिसांनी योग्य ते नियंत्रण दवरचें अशी मागणी मिशन फोर लोकलचे राजन कोरगांवकार हांणी केल्या.
कदंब बस स्टॅण्डार येरादारी विभाग अस्तित्वांत आसा. ह्याच बस स्टॅण्डार पेडणें पालिका मंडळ तांचें प्रशासकी कार्यालय आनी कांय अंतराचेर पेडणें पुलीस स्टेशन, पेडणें येरादारी पुलीस विभाग कार्यरत आसा. ह्या सगल्या गजालीं कडेन लक्ष दीत जाल्यार येरादारीची कोंयडी जायत आशिल्ल्या वाठारांत मात संबंदिताची आडनदर जाल्ल्याचें दिसून येता.
पेडणें शारांत येरादारी कोंयडीचेर नियंत्रण दवरपाक पेडणें पुलीस, पेडणें येरादारी विभाग आनी पेडणें येरादारी पुलीस अपेशी थारत आसात. खूबशीं वाहनां रस्त्याच्या दोनूय वटांनी खंयचे खंय पार्क करून हेर वाहनांक अडचण निर्माण जायत आशिल्ल्याचें चित्र दिसून येता. एके वटेन कदंब बस स्टॅण्डा सामकार कांय वाहनां खातीर पयलीं पार्किंगेची सोय आशिल्ली. ते सुवातेर गाडे उबारल्यात. पयलीं ते सुवातेर पार्कींग करताले. पूण आतां वाहनां आयल्यान दवरतात. पयलींच अरुंद रस्तो, तातूंत पार्किंगेची आनीक भर पडत आशिल्ल्याचें दिसून येता.
दुसरे वटेन कदंब बस स्टॅण्डार पार्कींग तळ आसा. थंय पार्कींग वेवस्था आसून लेगीत वाहन चालक थंय वाहनां पार्क करिनात. मेळत ते सुवातेर वाहनां पार्क करतात. ह्या वेळार एखाद्या वाहन चालकाक ताकतिकेन वचपाचें आसत जाल्यार खूब अडचण जायत आशिल्ल्याचें चित्र दिसून येता. हाचे कडेन सरकारान वेवस्थीत लक्ष दिवन दिसानदीस जावपी येरादारी कोंयडेचेर लक्ष दिवपाची मागणी लोकांनी केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
