भांगरभूंय | प्रतिनिधी
म्हापशें: डिफेन्स कॉलनी, पर्वरे अनवळखी चोरांनी बंगलो फोडून 1 लाख रोख रकमे सयत 6 लाखांचो म्हालवज फारायलो. ही चोरयेची घडणूक काल (शुक्रारा) सकाळीं 10.30 ते दनपारां 3 ह्या साडेचार वरां मजगतीं घडली.
कागाळदार रवी बार्रेटो हांचो डिफेन्स कॉलनी, लेन 1 मदलो बंगलो चोरांनी फोडलो. बंगल्यांतली आलमार उक्ती करून चोरांनी 6 मुदयो, 8 भांगराच्यो सरपळ्यो, 6 बांगड्यांचे दोन सेट, चार बांगड्यो आशिल्ले दोन सेट, 2 बांगड्यो आशिल्लो एक सेट, दोन बांगड्यो (अश्यो वट्ट 24 बांगड्यो). गोल्ड क्रॉस पेंडेन्ट आशिल्ली भांगराची सरपळी, एक कोरस नॅकलेस, कानांतलीं, दोन मुदयो, 10 गोल्ड पेंडेन्ट, एक पर्ल नेकलेस सेट हें भांगर तशेंच 1 लाख रोख रक्कम, चार घडयाळी आनी भांगर दवरिल्ली लोखंडाची पेटी असो म्हालवज चोरून व्हेलो.
कागाळदार बंगलो बंद करून भायर सरिल्लो. दनपारां 3 वरांचेर परतले उपरांत घराच्या मुखेल दाराचें कुलप तोडिल्लें. हो चोरयेचो प्रकार नदरेक येतकूच तांणी पर्वरी पुलिसांक आपयलें. पुलिसांनी पंचनामो करून वास घेवपी सुणें आनी ठशे तज्ञांचो उपेग केलो.
पुलिसांनी अनवळखी चोरां आड भादंसंच्या 454 आनी 380 कलमा खाला गुन्यांव नोंद केला. फुडलो तपास पुलीस निरिक्षक अनंत गांवकार हांच्या मार्गदर्शना खाला उपनिरिक्षक प्रणिता मांद्रेंकार करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
