भांगरभूंय | प्रतिनिधी
पणजी, प्रतिनिधी: हांव पंदरा वर्सां पयलीं कला अकादमींत शिक्षण घेवपा खातीर आयिल्लों. तेन्ना म्हाका कोणूच वळखनाशिल्ले. आयज गोंयचे लाखांनी लोक म्हाका वळखतात. फुडल्या पंदरा वर्सांनी परत कोणून वळखना जायत. चित्रपट सृश्टींत मेळिल्ली फेम बनावट आसता अशें फामाद अभिनेतो पंकज त्रिपाठी हांणी सांगलें.
कलाकारान कलात्मक नदरेन जिवो उरपा खातीर विंगड विंगड प्रयोग करपाची गरज आसता. कलाकार स्वताच रचिल्ल्या फटकिरे प्रतिमेंत जगता. अश्या वेळार एक बरो कलाकार तातूंतच सांडपाची शक्यताय आसता, असो हुस्को तांणी उक्तायलो.
इफ्फीच्या ‘इन कॉन्व्हर्सेशन’ ह्या सत्रांत पंकज त्रिपाठी उलयताले. चित्रपट समीक्षक मयंक शंकर हांणी तांची मुलाखत घेतली.
सुरवातेक लोकांक हांसोवपाच्यो भुमिका हांवें केल्यो. लोकांक त्यो भोव मानवल्यो. हांवें अश्योच भुमिका करच्यो अशी प्रेक्षकांची आनी दिग्दर्शकांची अपेक्षा आशिल्ली. नवो प्रयोग केल्यार चित्रपट चलनाशिल्लें. पूण सेगीत एकेच तरेचें काम केल्ल्यान म्हजे मदलो अभिनेतो उबगलो, अशें तांणी फुडें म्हणलें.
हालींच इफ्फींत प्रदर्शीत जाल्ल्या ‘कडक सिंग’त आमी कितें तरी वेगळो प्रयोग करपाचो निर्णय घेतलो. ह्या चित्रपटांत आपलो बेस्ट सेलींग पॉयंट घालूंक ना. ह्या चित्रपटा खातीर लोकांचो प्रतिसाद पळयल्यार हो प्रयोग येसस्वी जाला अशें म्हणचें पडटलें, अशें तांणी म्हणलें.
खंयचेय भुमिके खातीर स्वता भितर योग्य बदल करून घेवप गरजेचें आसता. मनीस विंगड विंगड भुमिकेंत जगता. पूण ताका जर अभिनय करपाचो आसल्यार त्या पात्राची ताका परत निर्मिती करची पडटा. ताका लागून अभिनयाचें प्रशिक्षण आसप गरजेचें. केन्ना केन्ना एक बरो दिग्दर्शक फातरा कडल्यानूय बरें काम करून घेवपाक शकता, अशेंय तांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
