भांगरभूंय | प्रतिनिधी
नवी दिल्ली, खबरां संस्था : कतारचे बंदखणींत आशिल्ल्या भारताच्या ८ आदल्या नौसैनिकांच्या फाशीचे शिक्षे आड भारत सरकारान थंयच्या सर्वोच्च न्यायालयांत अपील दाखल केल्या. भारतीय परराष्ट्र मंत्रालयाचे प्रवक्ते अरिंदम बागची हांणी पत्रकार परिशदेंत ही म्हायती दिली.
बागची हांच्या म्हणण्या प्रमाण, सैनिकांक मेळपा खातीर भारताक दुसरो कॉन्सुलर ऍक्सेसूय मेळ्ळा. भारत सरकार कतारच्या सेगीत संपर्कांत आसा.
कतारांत मरणाची ख्यास्त फर्मायल्ले आदले नावीक अधिकारी अशे आसात – कॅप्टन नवतेज सिंग गिल, कॅप्टन सौरभ वशिष्ठ, कॅप्टन बिरेंद्र कुमार वर्मा, कमांडर पूर्णेंदू तिवारी, कमांडर सुगनाकर पकाला, कमांडर संजीव गुप्ता, कमांडर अमित नागपाल आनी नावीक रागेश.
भारत आनी कतार हांचे मदले द्विपक्षीय संबंद सुदारपा खातीर केल्ल्या वावराक लागून निवृत्त सेनापती पूर्णेंदू तिवारी हांकां २०१९ वर्सा प्रवासी भारतीय सम्मान पुरस्कार फावो जालो.
बागची हांच्या म्हणण्या प्रमाण, भारताक हे प्रकरणांत दुसरे खेपे कॉन्सुलर प्रवेश मेळ्ळा. भारत सरकार ह्या प्रकरणांत कताराच्या अधिकार्यां कडेन संपर्कांत आसा. कतारच्या ‘कोर्ट ऑफ फर्स्ट इन्स्टन्स’न ही ख्यास्त आयकयल्या. हो निर्णय गुप्त दवरला आनी फकत आरोपीच्या कायदेशीर पंगडा कडेन वांटून घेतला. हे ख्यास्ती आड आमी उच्च न्यायालयांत अपील केलां. कताराच्या राज्य सुरक्षा ब्युरोच्या गुप्तचर एजन्सींतल्यान ३० ऑगस्ट २०२२ दिसा भारतीय नौदलाच्या आदल्या ८ अधिकार्यांक अटक केली. पूण सप्टेंबराच्या मध्याक ताका अटक केल्ल्याची म्हायती भारतीय दूतावासाक मेळ्ळी.
३० सप्टेंबराक ह्या भारतीयांक थोड्या वेळा खातीर आपल्या कुटुंबा कडेन दूरध्वनी वरवीं उलोवपाक मेळ्ळें. ताका अटक जाले उपरांत एक म्हयन्यान ३ ऑक्टोबराक पयलेच खेपे कॉन्सुलर प्रवेश मेळ्ळो. ह्या वेळार भारतीय दूतावासांतल्या एका अधिकार्याक तांकां मेळपाक मेळ्ळें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
