भांगरभूंय | प्रतिनिधी
– मुख्यमंत्रीः गोंयांत काय घरांनी कोंकणी उलोवप बंद
— दिवचले शैणे गोंयबाब जयंती निमतान मनयली
– मूळ गोंयकार वळख भाशा, संस्कृतायेंतल्यान उरतली
– महाराष्ट्रांतले लोक मागतात कोंकणीचें प्रमाणपत्र
पणजीः गोंयांत कांय घरांनी कोंकणी उलोवपच बंद जाल्या. ही आमची भास तिगोवन दवरतले आसत जाल्यार सरकारी नोकरी मेळपाचे हांयेसाक लागून तरी कोंकणी उलोवची म्हूण कर्मचारी भरती आयोगा वरवीं नोकरी खातीर कोंकणीची सक्तीं केल्या. हाका लागून गोंयकारांक नोकऱ्यो मेळटात. पयलीं नोकऱ्यो कश्यो मेळटाल्यो हे विशीं हांव उलयना. नोकरी खातीर कोंकणीचें प्रमाणपत्र मागपाक महाराष्ट्रांतल्यान लोक येतात, अशें मुख्यमंत्री, डॉ. प्रमोद सावंत हांणी सांगलें.
दिवचले शैणे गोंयबाब हांचे 149 वे जयंती निमतान मुखेल सोयरे म्हूण मुख्यमंत्री डॉ. प्रमोद सावंत उलयताले.
फाटल्या 60 वर्साचो इतिहास काडून पळयात जर कर्मचारी निवड आयोगांत कोंकणी सक्ती नाशिल्ली जाल्यार कितले लोक भायल्या राज्यांतले गोंयात येताले हे तुमका कळपाचे. हो म्हज्या मूळ गोंयकारांचेर अन्याय, अशें मुख्यमंत्र्यान म्हणलें.
लोकांनी फ्रेंच, जर्मन, पुर्तुगेज ह्यो विदेशी भास शिकचोच, पुण तेच वांगडा आपली मुळावी भास शिकप हे गरजेचें आसा. आजकाल कोंकणी घरात उलोवपाची बंद जाल्या. गोंय कर्मचारी निवड आयोग वरवीं केन्ना तरी आपल्याक सरकारी नोकरी मेळोवपाक जाय ह्या हेतान कोंकणी शिकनात पुण ते तरी उलयतात. आमची मुळ गोंयकार ही वळख आमचे भाशेंतल्यानच आनी संस्कृतायेंतल्यान उरपाक शकता, अशें मत मुख्यमंत्र्यान मांडले.
केंद्राच्या पोस्ट खात्यांतले नोकरेंत कोंकणीची सक्ती केल्या. पूर्णानंद च्यारी सांगताले ते भशेन महाराष्ट्रातले लोक येवन कोंकणी अकादेमी कडेन कोंकणींतल्यान प्रमाणपत्राची मागणी करतात. जर तुमकां कोंकणी कळना जाल्यार कोंकणीचें प्रमाण तुमकां कित्याक दितले अशें सांगून तांकां प्रमाणपत्र दिनात ही गजाल खरी आसा, अशें मुख्यमंत्र्यान सांगलें.
फाटल्या साडेसात वर्सात हावेन केल्ले काम खूब उणे लोक उलयतात. हे काम खबर आसूनय ते कित्याक उलयनांत हेय म्हाका खबर ना. तांकां विशिश्ठ लोकांचे काम आवडटा कांय कितें अशे म्हाका दिसपाक लागिल्ले. म्हजे सारिकिल्ल्या सामान्य आनी बारीक समाजांतल्या मनश्यान केल्ले हे काम गोंयच्या दृश्टीन व्हड आसा, अशें मुख्यमंत्र्यान सांगलें.
रस्ते आनी पूल 100 वर्सा तिगतले. पूण ताचे वांगडा संस्कृताय ही तिगोवन दवरप हेय म्हत्वाचें आशिल्ली. पिळग्यान पिळग्यो तिगून उरपी मांडवी आनी झुवारी पुलांची आमी तरतुद केल्या. जर संस्कृतायेची तिगोवन दवरपाची तरतुद करूंक नासली जाल्यार आमी गोंयची अस्मिताय विसरतले आसले. ताचो मुळावो पांवडो घालपाचें काम म्हज्या कार्यकाळांत जाला, अशें मुख्यमंत्र्यान म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
