भांगरभूंय | प्रतिनिधी
वास्को : खारीवाडो-वास्कोच्या नुस्तेमार्यांक आजूनय स्वतंत्र जेटीची सुविधा उपलब्ध नाशिल्ल्यान पावसांत नुस्तेंमारी बोटींच्या नांगरणीचो प्रस्न परत मुखार आयला. राशोल वाठारांतल्या लोकांनी खारीवाड्यावेल्या नुस्तेंमार्यांनी बोटी तांच्या भागांत नांगरल्यार नितळसाण आनी भौशीक त्रासांची समस्या निर्माण जावपाची कागाळ केल्या. हाका लागून बोटी नेमस्यो खंय नांगुरच्यो असो प्रस्न खारीवाड्यावेल्या नस्तेंमार्यांक पडला.
बोटी नांगरपा खातीर पर्यायी सुवातेची गरज
खारीवाड्यावेल्या बोट धनयांनी ह्या आरोपांचें खंडण करतना ट्रॉलरवेल्या कामगारांक लागून कसलीच अस्वच्छताय वा भौशीक उपद्रव जायनाशिल्ल्याचो दावो केला. नुस्तेंमारी बोट धनयांच्या म्हणणया प्रमाण, मान्सून काळांत सुरक्षीत नांगरणी खातीर पर्यायी सुवातेची गरज आशिल्ल्यान ते खातीर प्रशासनान योग्य तो निर्णय घेवचो.
हेच फाटभूंयेर संबंदीत बोटधनी संघटणेन मान्सून हंगामांत नुस्तेंमारी बोट उबी करपा खातीर स्वतंत्र आनी कायमची सुवात उपलब्ध करून दिवपाचो प्रस्ताव प्रशासना कडेन सादर केला. हाका लागून बरोच काळ प्रलंबीत आशिल्ले जेटीचे मागणेक परत एक फावट नेट मेळ्ळा, प्रशासनान हाचेर बेगोबेग तोडगो काडपाची अपेक्षा उक्तायल्या.
थळावे नागरीक, नुस्तेंमार आनी बोटधनी हांचे मदीं समन्वय सादून सगल्यां खातीर सोयीच्यो उपाय येवजण्यो करच्यो, अशी मागणी दोनूय वटांनी केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
