भांगरभूंय | प्रतिनिधी
गोवा कोंकणी अकादेमी, दिवचल कोंकणी सेवा केंद्रान कोंकणीचे म्हापुरुस शणै गोंयबाब हांची 149 वी जयंती काल मनयली. तातूंत मुख्यमंत्री डाॅ. प्रमोद सावंत हांचो राज्यांतल्या विवीध कोंकणी संस्थां वतीन भोवमान जालो. त्या वेळार तांकां भेटयिल्लें भोवमान पत्र.
डॉ. प्रमोद पांडुरंग सावंत
मानादीक मुख्यमंत्री तशेंच राजभाषा मंत्री, गोंय राज्य
गोंय राज्याचे 11 वे मुख्यमंत्री म्हणून तुमी 2019 वर्सा कारभार स्वीकारलो. विकसित गोयां बरोबरच, प्रधानमंत्री मानादीक नरेंद्र मोदी हांचें ‘विकसित भारत 2047’ चें उद्दिष्ट ध्येय म्हणून धरून तुमी कार्य करतात. ‘स्वयंपूर्ण गोंय’ हें तुमचें मिशन!
कोंकणीचे युगपुरुश – आधुनिक कोंकणी भास आनी साहित्याचे शिल्पकार शणै गोंयबाब म्हणल्यारूच वामन रघुनाथ वर्दे वालावलीकार हांच्या ह्या जल्म गांवाच्या दिवचल म्हालांतले, तुमी पयले मुख्यमंत्री हाचो आमकां व्हड अभिमान आसा. शणै गोंयबाब हांचो ‘अमृताचो पावस’ प्रत्यक्षांत हाडपाक तुमी तुमची कार्यकुशलता गोंयां खातीर वापरतात, तें पळोवन आमचीं मनां-काळजां खोशयेन भरून येतात.
‘भिवपाची गरज ना’ हो तुमी गोंयकारांक दिल्लो प्रेरणा मंत्र. ह्या मंत्रान गोंयच्या तरणाट्यां मदीं गोंय राज्य कर्मचारी आयोगाचे तटस्थ, निव्वळ आनी पारदर्शक निवड प्रक्रियेंतल्यान कर्तृत्व आनी आत्मविश्वास जागयलो. हे लेखी निवड प्रक्रियेत कोंकणींतल्यान परिक्षा पास जावप सक्तीचें केलें आनी जो कोंकणींत पास जायना, ताका सरकारी नोकरी ना, असो कडक नेम केलो. नोकरे खातीर कोंकणी भाशेचें ज्ञान आशिल्ल्याचो दाखलो गोवा कोंकणी अकादेमींतल्यान रीतसर परीक्षा दिवन घेवप, हें तुमच्याच कार्यकाळांत घडलें. इतलेंच न्हय, तर केंद्र सरकारच्या पोस्ट खात्यांत गोंयांत नोकरे खातीर कोंकणी भाशेचें ज्ञान सक्तीचें ह्या नेमाची खर अंमलबजावणी केली.
गोंय राज्याचो अर्थसंकल्प राज्य विधानसभेंत कोंकणींतल्यान सादर करपाची आनी विधानसभेचें कामकाज कोंकणींतल्यान चलोवपाची तुमच्या सरकाराची परंपरा मुखार व्हरतना, तुमी गोंयचे राजभाशेक म्हणल्यारूच कोंकणी भाशेक प्रतिश्ठा मेळोवन दिली.
कोंकणी शिक्षणाच्या मळार ‘राष्ट्रीय शिक्षण धोरण 2020’ ची प्रभावी अंमलबजावणी ही तुमच्याच कार्यकाळांत गोंयांत सुरू जाली. शिक्षणांत कोंकणी भाशेक सुविधा -सवलती आनी मान दिवपी तुमी प्रभावी मुख्यमंत्री म्हणून आमी गोंयकार अभिमानान नोंद घेतात. कोंकणी भाशेंतल्यान ज्ञानशाखांचो अभ्यास जावंचो म्हणून, विश्व विद्यालयाच्या पावंड्यार कोंकणींतल्यान ज्ञानभाशा येवपा खातीर तुमी केल्लें मार्गदर्शन फुडाराचें गोंय ‘ज्ञानभाशा कोंकणी’ घडयतली, हो आत्मविश्वास तुमी शैक्षणिक मळार जागयलो. शैक्षणिक सुविधांच्या बाबतींत गोंय राज्य प्रगत करपाचें कार्य तुमी केलां.
गोंय राज्याचे मुख्यमंत्री तशेंच राजभाषा मंत्री म्हणून तुमी दिल्लें योगदान इतिहासिक रूपाचें आसा. राजभाशेची प्रभावी अंमलबजावणी करताना, तुमी राष्ट्रीय पावंड्यार कोंकणी हेर भारतीय प्रगत भाशां वांगडाच साहित्याच्या मळार आनी तंत्रज्ञानाच्या मळारूय समृद्ध जावपाची शिस्तबद्ध आंखणी केल्ली. राजभाशा प्रशिक्षण वर्ग, कोश निर्मिती, डिजिटल कोंकणी, शासन प्रशासन आनी न्याय वेवस्थेच्या पावंड्यारूय तुमी दिल्लें योगदान इतिहासिक स्वरूपाचें आसा.
रवींद्र भवन साखळीचे अध्यक्ष ह्या नात्यान, तशेंच राज्याचे प्रभावी तरुण लोकनेते म्हणून तुमी तरेकवार उपक्रमांतल्यान कोंकणी नाट्य, संगीत, संस्कृती आनी डिजिटल माध्यमांनी तोलामोलाचो वावर केला. राज्य पावंड्यार चलपी कोंकणींतल्या सरकारी तशेंच अनुदानीत आनी हेर संस्थां वरवीं हो वावर मुखार वता. राष्ट्रीय पावंड्यार आशिल्ल्या कला-संस्कृती आनी नाट्य संस्थांक गोंयांत येवन काम करतना, ‘कोंकणी आमची अस्मिताय’ ही जाणविकाय आनी वळख राष्ट्रीय तशेंच आंतरराष्ट्रीय पावंड्यार तुमी दिली.
16 जानेवारी 1967 वर्सा गोंयकारांनी गोंय महाराष्ट्रांत विलीन जावपा पसून मतदानाच्या रूपान आडायलें. भारतांतल्या पयल्याच आनी आता मेरेनच्या एकमेव ‘ओपिनियन पोला’न गोंयची अस्मिताय भुगोलिक नदरेंतल्यानूच न्हय, तर भाशीक, सांस्कृतीक आनी महत्त्वाचें म्हणल्यार राजकी नदरेंतल्यानन तिगोवन दवरली. मानादीक डॉ. प्रमोद सावंत, तुमी गोंयचे पयले मुख्यमंत्री जांणी 16 जानेवारी 1967 ह्या दिसाची जाणविकाय म्हणून राज्यांत 16 जानेवारी हो ‘अस्मिताय दीस’ म्हणून मनोवचो, हो इतिहासिक निर्णय घेतलो. ते खातीर सगळे गोंयकार आनी भारतीय अस्मितायेचे राखणदार तुमचे मना-काळजांतल्यान उपकारी आसात!
गोंय मुक्ती झुजांतले पयले हुतात्मे बाळा राया मापारी हांची स्मृती जनमानसांत कायमची उरची म्हणून, बाळा राया मापारी हांची पुण्यतिथ ‘गोंय राज्य पावंड्यार’ ‘बलिदान दीस’ म्हणून मनोवपाचो स्वाभिमानी निर्णय तुमी घेतलो. इतलेंच न्हय, तर गोंय सुटके झुजांत जे अमर हुतात्मे जालेत, त्या भारतभरांतल्या सगळ्या हुतात्म्यांच्या वारसांचो भोवमान करून, अर्थिक नदरेंतल्यानूय तांच्या घरच्यांक भरभरून आदार दिवन तुमी गोंय मुक्ततायेचें रीण पावोवपाचें व्हड कार्य मुख्यमंत्री म्हणून केलां.
मानादीक डॉ. प्रमोद सावंत, तुमी संवेदनशीलताय आनी सर्वसमावेशकताय पाळपी, तशेंच वैजकी मळावेलो नीती-संकेत पाळपी दोतोर-मुख्यमंत्री! वैजकी मळार तुमची ‘नाडी परीक्षा’ अचूक! तुमचें निदान आनी उपचारय अचूक! तीच कुशळताय तुमी गोंय राज्याच्या सर्वांगीण उदरगतीक वापरल्या. ‘कोंकणी राज्य’ म्हणून आपली वळख घडयल्या. कोंकणी कुणबी वस्त्र, कोंकणी दिवली भेट वस्तू, कोंकणी भाशा ही वळख तुमी संवसाराक दाखयल्या. ते निमित्तान संवसारिक पावंड्यार आशिल्ले सगळे कोंकणी मनीस, सगळ्या भाशांचे स्वाभिमानी, तुमका ‘देव बरें करूं’ म्हणटात.
कोंकणीचे युगपुरूश शणै गोंयबाब हांचे जयंती निमित्तान 23 जून 2026 दिसा, दिवचल कोंकणी सेवा केंद्र आनी गोवा कोंकणी अकादेमी हांच्या जोडपालवान आयोजीत राज्य उत्सवांत, तुमच्या ह्या म्हान कार्या खातीर आमी तुमकां हें भोवमान पत्र भेटयतात.
रुपेश नारायण ठाणेकार
कार्याध्यक्ष, शणै गोंयबाब जयंती उत्सव 2026
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
