भांगरभूंय | प्रतिनिधी
पणजी : विधानसभा वेंचणुके खातीर राजकी पक्ष तशेंच इत्सूक उमेदवारां कडल्यान नेटान तयारी सुरू आसतना वेंचणूक आयोगान लेगीत विधानसभा वेंचणुकेची प्रक्रीया सुरू केल्या. विधानसभेच्या सगळ्या ४० मतदारसंघां खातीर साहाय्यक वेंचणूक नोंदणी अधिकार्यांची नेमणूक केल्या. मतदारसंघ आशिल्ल्या म्हालाचे मामलेदार वा जोड मामलेदारांची साहाय्यक वेंचणूक नोंदणी अधिकारी म्हूण नेमणूक जाल्या.
हे विशींची अधिसुचोवणी केंद्रीय वेंचणूक आयोगान जारी केल्या. हाचे पयलीं दरेकी मतदारसंघांत वेंचणूक नोंदणी अधिकार्यांची नेमणूक जाल्या. ह्यान पयलीं ही अधिसुचोवणी जारी जाल्या. वेंचणूक नोंदणी अधिकारी म्हूण मतदारसंघ आस्पावीत आशिल्ल्या म्हालाच्या मामलेदारांची नेमणूक जाल्या. आतां नेमणूक जाल्ले साहाय्यक वेंचणूक नोंदणी अधिकारी हे वेंचणूक नोंदणी अधिकार्यांक वेंचणूक तयारीच्या कामांत मजत करतले.
गोंय विधानसभेचो कार्यकाळ हो मार्च २०२७वर्सा सोपता. कार्यकाळ सोपोवपाक ६ म्हयन्यां परस चड तेंप आसलो तरी सगळ्या राजकी पक्षांनी बसका, सभा घेवपा सयत रणनिती आखपाक सुरवात केल्या. हाका लागून अंदूंच मुजती पयलीं वेंचणूक जावपाची शक्यताय आसा. हे फाटभूंयेर आतां वेंचणूक आयोगान लेगीत विधानसभा वेंचणुकेची प्रक्रीया सुरू केल्या. साहाय्यक वेंचणूक नोंदणी अधिकार्याची नेमणूक जावप हो हे प्रक्रीयेचो भाग आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
