भांगरभूंय | प्रतिनिधी
म्हापशें : चिखले- कोलवाळे उद्देगीक वसणुके लागसार बंद पडिल्ल्या ट्रकाक दुचाकीन नेटान धपको दिल्ल्यान रविश यदुनंद तारी (२०, सांत इस्तेव, तिसवाडी) ह्या तरणाट्याक मरण आयलें. जाल्यार लक्ष्मण भोसले (१८, हळदोणा) हो तरणाटो गंभीर जखमी जाला.
हो अपघात सोमारा रातच्या सुमार ११.३० वरांचेर जालो. रविश आनी जखमी लक्ष्मण हे दोगूय इश्ट कामुल्ले आपल्या मामाच्या घरा गेल्ले. थंयच्या परततना हो अपघात जालो.
घडणुके सुवातेर ग्लेनमार्क कंपनी लागसार रस्त्या कुशीक माल व्हरपी ट्रक फाटल्या आठ दिसां पसून बंद पडिल्लो. ह्या ट्रकाक फाटल्यानच्यान फसिनो दुचाकीन धपको दिलो. ह्या अपघातांत दोकूय दुचाकीवेल्यान पडून जखमी जाले. जखमींक ऍम्बुलन्सींतल्यान म्हापश्या जिल्लो हॉस्पिटलांत व्हेले. मात दोतोरांनी रविश हाका मरण आयिल्ल्याचें सांगलें. जाल्यार लक्ष्मण भोसले हाका फुडल्या उपचारा खातीर गोमेकॉंत धाडला. ताचेर उपचार सुरू आसात.
अपघाताची म्हायती मेळटांच पुलिसांनी थंय येवन पंचनामो केलो. कोलवाळेचे पुलीस उपनिरीक्षक दत्तराज राणे आनी सहाय्यक उपनिरीक्षक अनिल पिळगांवकार हांच्या मार्गदर्शना खाला पुलीस फुडलो तपास करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
