भांगरभूंय | प्रतिनिधी
पणजी: २०२६ वर्सा खातीर विमला वी. पै विश्व कोंकणी जीवन सिद्धी सन्मान (पुरस्कार १) खातीर अर्ज मागयल्यात. कोंकणी भास, शिक्षण, कला आनी संस्कृतीचे उदरगती खातीर जिवीतभर वावर केल्ल्या एका ज्येश्ठ कोंकणी नागरिकाक हो सन्मान फावो जातलो आनी हो प्रशस्तीक अर्ज सादर करपाक आपोवणें दिलां.
विमला वी. पै विश्व कोंकणी साहित्य कृती पुरस्कार आनी कविता कृती पुरस्कार (पुरस्कार २ आनी ३):
१ जानेवारी २०२३ ते ३१ डिसेंबर २०२५ ह्या काळांत प्रकाशीत जाल्ल्या कोंकणी देवनागरी लिपींत बरयल्लें एक गद्य साहित्य कृतीचें आनी एक कविता कृतीचें नांव सुचोवन अर्ज सादर करपाक आपोवणें दिलां. ह्यो कृती अनुवादीत वा शिक्षणीक अभ्यास संबंदीत आसूंक नजो.
बस्ती वामन शणै विश्व कोंकणी सेवा पुरस्कार (पुरस्कार ४ आनी ५):
मुळांत कोंकणी भाशीक आसून, शिक्षण, सार्वजनीक सेवा, प्रशासन, समाजसेवा, भलायकी सेवा, विज्ञान, पत्रकारिता, प्रदर्शन कला, मानवीक सेवा, उद्योग-व्यापार, क्रीडा आदी क्षेत्रांत उच्च दर्जाची प्रामाणिक वाव्र करून जनसेवा दिल्ले व्यक्ती वा संस्था-संघटनाक ह्या पुरस्कारां खातीर नामनिर्देशन करपाक वा अर्ज धाडपाची मागणी केल्या.
ह्या पांच पुरस्कारांचें स्वरुप रु. १,००,०००/- नकद, सन्मानपत्र आनी स्मृतीफलक अशें आसा. हे पुरस्कार विश्व कोंकणी केंद्राचे महापोषक मानेस्त टी. वि. मोहनदास पै हांची आवय विमला वी. पै हांच्या उगडासान दितले.
इत्सुकांनी वा संस्था-संघटनांनी विश्व कोंकणी केंद्राचे वेबसायटीन म्हायती घेवन ३१-०८-२०२६ मेरेन ऑनलायन नामनिर्देशन नोंद करपाक, तशेंच फोटो, प्रशंशा पत्र, साहित्य कृती आनी कविता कृतींची ३ पुस्तकां पयलीं सगळे दस्तावेज पोस्टा वरवीं सकयल दिल्ल्या पत्त्याचेर धाडून दिवचें असो उलो विश्व कोंकणी केंद्रा वतीन मारला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
