भांगरभूंय | प्रतिनिधी
पणजीः जीं नांवां एसआयार प्रक्रियेंतल्यान डीलीट जाल्यांत तीं नांवां परत फॉर्म ६ अ वरवीं रोलाचेर आस्पावन घेवपाक सुरवात जाल्या. हे विशीं लोकांची मजत करपा खातीर काँग्रेसीन ७८७५८३३८३३ हेल्पलायन जारी केल्या, अशी म्हायती हळदोणेचे आमदार कार्लुस फेरेरा हांणी दिली.
पणजे काँग्रेस हावजांत आपयल्ले पत्रकार परिशदेंत कार्लुस फेरेरा उलयताले. ह्या वेळार कॉंग्रेसीचे फुडारी अमित पालेकार आनी सावियो कुतिन्हो हजर आशिल्ले.
एसआयआर प्रक्रीयेंत खूब जाणांचीं नांवां फटींगपणां करून डिलीट केल्यांत आनी भाजपान आपल्या बीएलाक वळेरी दिवन विरोधी मतदारांचीं नांवां डिलीट करपाक सांगल्यांत, अशें फेरेरा हांणी सांगलें.
डिलीट जाल्ल्या लोकांचीं नांवां परत मतदार वळेरेंत घालपा खातीर फोर्म ६ सुरू जालां. हें फॉर्म भरून लोकांक परत मतदारां खातीर अर्ज करपाक मेळटात. तशेंच नांवां डिलीट जाल्ले काय लोकांनी जिल्लोधिकारी जे जिल्लो निर्वाचन अधिकारी आसात तांचे मुखार याचिका दाखल केल्ली. जिल्लोधिकार्यान तांचीं नांवां परत आसपावन घेवपाचो आदेश दिला. मात इआरओ लोकांक त्रास करता, असो आरोप फेरेरा हांणी केला.
हे फाटभूंयेर कॉंग्रेसीन ७८७५८३३८३३ हो हॅल्पलायन नंबर जारी केला. हो हॅल्पलयन नंबर फक्त व्हॉटसेपाचेर संदेश धाडपा पुरती मर्यादीत आसतलो. आमचो दर मतदारसंघांत एक पंगड आसतलो आनी व्हॉटऍपाचेर हॅल्पलायन नंबरा वरवीं कळीत करचें. आमचो पंगड रोखडोच तुमच्या संपर्कांत येवन तुमकां फावो ती मजत आनी मार्गदर्शन करतले, अशी म्हायती फेरेरा हांणी दिली.
मजगतीं ज्या लोकांचीं नांवां डिलीट केल्लीं त्या लोकांनी जिल्लोधिकार्याचे कचेरेंत याचिका दाखल केल्ली. १६ मार्च २०२६त याचिका मान्य करून तांचें नांव परत आसा तशें मतदार वळेरेंत घालपाचो आदेश जिल्लोधिकार्यान दिल्लो. मात इआरओ तांकां फोर्म ६ परत भरपाक लायता. आदेश स्पश्ट आसा काय तांचीं नांवां सरळ मतदार वळेरेंत घालचीं. जर तांकां परत फोर्म भरप लावप हो आदेशाचो अवमान आसा, अशें फेरेरा हांणी स्पश्ट केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
