भांगरभूंय | प्रतिनिधी
मडगांव, प्रतिनिधी : नुवेंची समंथा फर्नांडीस (३०) हिका ३० ऑगस्टाक उज्यांत हुलपून मरण आयिल्लें. समंथाची मांय हुंड्या खातीर तिका सतायताली असो आरोप समंथाचे आवयन केल्लो. कुटुंबियांनी तिची कूड स्विकारूंक नाशिल्ली. आतां तीन म्हयन्या उपरांत मायणा-कुडटरीच्या पुलिसांनी समंथा हिची मांय पॅट्रोसिना फर्नांडीस हिचे आड गुन्यांव नोंद केला.
हे विशीं पुलिसां कडल्यान मेळिल्ले म्हायती प्रमाण, सात वर्सां आदीं समंथा हिचें नोएल हाचे कडेन लग्न जाल्लें. नोएल परदेसांत आसता. नोएलाची आवय म्हळ्यार समंथाची मांय हुंड्या खातीर तिका त्रास दिताली. हें समंथान आपली आवय ऍना मारिया डायस हिकाय सांगिल्लें. निमाणें छळ आनी मानसीक त्रासाक विटून समंथान स्वताक उजो लावन घेतलो. ३० ऑगस्टाक जीएमसींत तिका मरण आयलें. पेट्रीसिना हिणें आपली धूव समंथाक हुंड्या खातीर त्रास केला. ताका लागून तिणें स्वताक उजो घातलो. २९ ऑगस्टाक समंथान आपल्याक फोन करून आनीक हे त्रास आपल्याक सोंसनात. पेट्रीसिना हिणें आपले चलयेकूय उज्याचे दाग दिल्यात आनी हें कोणाक सांगल्यार आपूण ताका मारतली अशी धमकीय दिली. उपरांत समंथा आनी मांय पेट्रीसिना हांचे मदीं वाद जालो. तेन्ना मांयन हुंड्याची मागणी केल्ली. मारतना स्वताक मांयचे तावडेंतल्यान सोडोवपा खातीर समंथान तिका धुकल्ली. उपरांत समंथान उजो लावन घेतलो, असो आरोप करून मारिया फर्नांडीस हांणी समंथाची कूड स्विकारपाक न्हयकार दिलो. ताका लागून सामंथाची कूड तीन म्हयने मोर्गांतूच आसली.
मारिया फर्नांडीस हांणी दक्षीण गोंय जिल्हो पुलीस अधीक्षकांक निवेदन सादर केल्ले. ताचे पयलींय मुखेल सचीव, गृह खातें, पुलीस महासंचालक आनी मडगांव पुलीस उपअधीक्षकांक तांणी निवेदन दिल्लें. हे विशीं न्यायदंडाधिकार्यांचो चवकशी अहवाल येवप उरिल्लें. हुंड्या खातीर आपले धुवेचो छळ जातालो. मांय पेट्रीसिना हिचेर खुनाचो गुन्यांव नोंद करपाची मागणी निवेदनांत आई मारिया हिणें केल्ली. हे विशीं मडगांव न्यायदंडाधिकार्यांनी चवकशे उपरांत निवाडो दिल्या उपरांत दुबावी मांय पेट्रीसिना हिचेर हुंड्या खातीर छळ करून, जीव दिवपाक प्रवृत्त केल्ले खातीर मायणा कुडटरीच्या पुलिसांनी गुन्यांव नोंद केला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
