नरकासुर लासले, सांगाडे कोणें व्हरप?
भांगरभूंय | प्रतिनिधी
पणजी, प्रतिनिधी ः गोंयभर व्हडा उमेदीन दिवाळी मनयली. दिवाळीच्या आदलें राती नरकासुर लासपाची परंपरा गोंयांत फाटल्या ५० वर्सां सावन आसा. आदीं वाड्या वाड्यार नरकासूर नासताले. शारांत १ वा २ नरकासुर. मात १९९० उपरांत नरकासुरांक ओतो आयलो. एकलो करता म्हूण दुसरो करपाक लागलो. राजकी फुडाऱ्यांनी मतांचे गुंतवणुकीचे नदरेन नरकासूर आयोजकांचेर पयशे ओतप सुरू केलें आनी गांवांगांवांनी सर्ती जावपाक लागल्यो.
आयज राज्यांत वेगवेगळ्या वाठारांनी ल्हान- व्हड नरकासुर करतात. सर्ती आयोजीत करतात. नरकासुराचे देखावेय करतात. शेनवारा राज्यांत ‘नरकासुराची रात’ अशींच व्हडा उमेदीन मनयली. फोंड्यां एका नरकासुराक सर्त चालू आसतना उजो लागलो.
नरकासुर केले उपरांत दिवाळे दिसा फातोडेर ताका लासतात. नकरासुर करपाक म्हयनोभर पयलीं सुरवात करतात. ते खातीर कागद, पुट्टे, तण, कपडे, लोखंड हाचो वापर करतात. तरणाटे रातभर नरकासुर नाचयतात, मजा करतात आनी मागीर ताका लासतात. शेनवारा मध्यानरातीर नरकासुराचें दहन जालें. पूण, हांतूतल्या बऱ्याच नरकासुरांचें सांगाडे अजून रस्त्यां कुशीक पडून आसात. ते व्हरपाची जापसालदारकी कोणाची? हाचे त्रास रस्तार चलपी लोकांक, वाहन चालकांक जाता. पणजेच्या कांय वाठारांनी आयज दनपरां मेरेन सांगाडे रस्ता कुशीक पडून आशिल्ले. हे सांगाडे लोखण, खिळे, सरयो हांचे आशिल्ल्यान लोकांक, सुणीं, गोरवांक घातक थारूं येतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
