भांगरभूंय | प्रतिनिधी
हायकोर्टाचो खोर्ली पंचायतीक आदेश
पणजी, प्रतिनिधी : मुंबय उच्च न्यायालयाच्या गोंय खंडपीठांत धुळापी- खोर्लेच्या श्री सांतेरी रवळनाथ देवस्थान समितीन आदलें देवूळ मोडून नवें बांदकाम केल्ले खातीर दुसर्या गटान याचिका दाखल केल्ली. हें बांदकाम बेकायदेशीर आशिल्ल्याचें सिद्ध जाल्ल्यान तें तीन म्हयन्यांत मोडून उडोवपाचो आदेश खंडपीठान आयज दिलो. बांदकाम मोडून उडोवपाचो येवपी खर्च देवस्थान समितीचे अध्यक्ष भिकू धुळापकार हांचे कडल्यान वसूल करचो, अशे निर्देश खंडपीठान दिले.
हे विशीं चड म्हायती प्रमाण, सांतेरी रवळनाथ देवस्थान समितीन आदलें देवूळ मोडून नवें देवूळ उबारलें. हाचेर दोन गट निर्माण जाले. एका गटान नव्या देवळाक विरोध केल्लो. आदलें देवूळ मोडून नवें बांदपाक आमकां विस्वासांत घेवंक ना, अशें तांचें म्हणणें. ताका लागून मार्च २०२३ त जेन्ना नवी मुर्ती प्रतिश्ठापने खातीर हाडली तेन्ना व्हडलो वाद जाल्लो. निमाणें प्रशासनाक हस्तक्षेप करचो पडलो. तांणी दोनूय गटांची बसका घेवन मुर्ती मंडपांतूच दवरची अशें सुचयलें. तशेंच खंडपीठाचो निकाल येयसर स्थिती आसा तशीच दवरपाची सुचवणी केली. ह्याच विशयाचेर आयज खंडपिठान निमाणो निवाडो दिलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
