भांगरभूंय | प्रतिनिधी
गोंयांत फाटल्या कांय दिसांनी एक अशी भानगड उक्ताडार आयली जी आज मेरेनच्या इतिहासांतली गोंयांतली सगल्यांत व्हडली भानगड आनी तेच बरोबर आमची गोंयकारांची मान लजेन सकयल घालपा सारकी गजाल. ती म्हणल्यार, नागरी पुरवण खात्याची धान्य भानगड. हे एके भानगडीन सगळ्यांचें पितळ उगडें केलें. मात वायट एकेच गजालीचें दिसता तें म्हणल्यार आमच्या गोंया सारकिल्या प्रदेशांत गरिबां खातीरचे तांदूळ चोरून भायले भायर विकप हाचे परस आनीक दुसरें दुर्दैव ना. हें कशें जालें? पुलीस ह्या प्रकरणांतल्या मुखेल दुबावितांक कित्याक धरपाक पावले नात? हे आनी अशे हेर प्रस्न साहाजिकूच कोणाकूय पडटले. मात, हातूंत एक गजाल परत एक फावट सिद्ध जाली ती म्हणल्यार आमचे ‘सिस्टमी’ क कितली वाळटी लागल्या ती.
नागरी पुरवण खात्याच्या गुदांवांतलें तांदूळ चोरून ते नागझर कुर्टीच्या एका खाजगी गुदांवांत हाडून दवरताले आनी ते पॉलीश करून कर्नाटकांत विकताले. गुदांवाचें ऑडीट करतना खात्याच्या एका गुदांवांत मायज माल मेळ्ळो आनी मागीर क्रायम ब्रांचीचें धाडसत्र सुरू जालें. उपरांत हो माल नागझर- कुर्टी एका खाजगी गुदांवांत सांठोवन दवरतात म्हूण कळ्ळें. क्रायम ब्रांचीन थंय घाल्ले धाडींत तांकां बेहिशोबी तांदूळ सांपडले. थंय आशिल्लो एक कर्नाटकाचो ट्रक आनी गोंयची एक जिपूय पुलिसांनी जप्त केली. ट्रकाच्या ड्रायवरांनी मान्यूय केले की हो माल सरकाराच्या नागरी पुरवण खात्याच्या गुदांवांतल्यान चोरून हाडटाले. तर अशे तरेन ही भानगड चलताली.
मात, इतलें सगलें आसुनूय ह्या प्रकरणांतलो मुखेल दुबावीत खाजगी गुदांवाच्या पात्रांवाक मात पुलीस धरपाक पावले नात. अजापाची गजाल म्हणल्यार सुमार 4 ते 5 दीस तो असोच भोंवतालो. निमाणो ताका जामीन मेळ्ळो. पुलीस यंत्रणेचेर कशें आनी कितलें राजकी चेपण आसता तें ह्या प्रकरणांतल्यान पुरायपणान सिद्ध जालें. एका चोराक वाटोवपा खातीर सगळे चोर एकठांय जाले आनी क्रायम ब्रांचीन घेतिल्ले सगले कश्ट उदकांत गेले. असल्यांनी पुलिसांचें मनोबल कशें वाडटलें? ते चोरांक कित्याक धरतले? एके वाटेन सरकार सांगता, आमची पुलीस यंत्रणा सामकी घटमूट आसा. आनी दुसरे वाटेन ह्या प्रकरणांतल्या एका साद्या दुबाविताक धरपाक अपेस येवप हातूंत लोकां मेरेन कितें संदेश वतलो हाचो विचारसुद्धा कोणें केलो ना. सगलेच लुटपाक पेटल्यात, दुर्दैव.
खऱ्यांनी धान्याची गरज आसा??
आमच्या गोंयांत सरकारी धान्याची खऱ्यांनीच गरज आसा काय हे गजालीचोय गंभीरतायेन अभ्यास जावपाक जाय. जांकां सरकारी धान्य घेतले बगर पर्याय ना, अशें कितले लोक आसतले काय? सद्याक गोंयांत अशी परिस्थिती आसा की जाचो मोटो बंगलो आसा तोयबीन रेशनाचेर धान्य घेता. जाच्या घरांत व्हडल्यो- व्हडल्यो गाडयो आसात तोय धान्य घेता. सरकारी पांवड्यार सर्व्हे करतात. मात तो खऱ्यांनीच प्रामाणीकपणान करतात काय? कांय सर्व्हे प्रामाणीकपणान करतात, मात उपरांत जे कठोर निर्णय सरकारी पांवड्यार घेवपाक जाय ते घेनात? जांकां रेशनाच्या धान्याची गरज ना, अशांचीं रेशन कार्डां कित्याक रद्द करिनात? काय हे अशे घोटाळे करपा खातिरूच हे सगळे मुद्दाम चालू आसा? हय, म्हाका जाल्यार अशेंच दिसता.
आमी आनीक एके गजालीचो हे निमतान गंभीरपणान विचार करपाची गरज आसा. म्हज्या ल्हानपणांत आमच्या गांवांत सगले कडेन पाचवींचार शेतां दिश्टी पडटालीं. गांवचे भोवतेक लोक शेत कसतालें. मात, हालीं तेंपार गांवांतलीं शेतां पडीक पडपाक लागल्यांत. लोकांनी शेतां लावपूच सोडले. कारण तांकां रेशनाचेर तांदूळ मेळपाक लागले. जंय शेतां कसताले थंय आतां बिल्डिंगो उब्यो रावपाक लागल्यो. रेशन कार्डाच्या धान्याचो हो असोय दुरुपेग जाला, हें आमकां मान्य करपाक जाय. जांकां खऱ्यांनीच गरज आसा तांकां अवश्य सरकाराचें राशन मेळपाची गरज आसा, हेंय तितलेंच खरें.
आमचें गोंय प्रगत राज्य म्हणटात, मात ह्याच प्रगत राज्यांत सादारण 29 रेशन सोसायट्यांनी बायोमॅट्रीक मशीन ना. कारण कितें तर थंय खंय मोबायलाची रेंज मेळना. बर्या मोबायलाची रेंज मेळना म्हूण सांगून सोंपले? ताचेर फुडें उपाय कितें? नागरी पुरवण खातें सांगता आमी खंय ही गजाल आयटी खात्याक कळयल्या आनी तांकां सांगलां की हाचेर उपाय काडचो. तो उपाय आजून आयिल्लो ना. आनी घडये येत म्हूण आशाय दिसना. आतां मजा म्हणल्यार जे सोसायट्यांनी बायोमॅट्रीक मशीन ना थंयच 100 टक्के धान्य लोकांनी व्हेला म्हूण नोंद आसा आनी जंय बायोमॅट्रीक मशिनां आसात थंय मात 60 टक्के, 65 टक्के, 70 टक्के धान्य लोकांनी व्हेल्ल्याची नोंद मेळटा. हाचो अर्थ स्पश्ट आसा. जीं गुड्डूलुसांवां जातात तीं अश्या सोसायट्यांनी जातात, जंय बायोमॅट्रीक मशीन ना. आनी ही गजाल खबर आसून पसून नागरी पुरवण खातें वा आयटी खातें पांयार पांय उडोवन वोग्गी आसा. म्हणजे हे ‘वंयूच शेत खाता’ अशें जालें.
मुख्यमंत्री दोतोर प्रमोद सावंत सदांच अंत्योदय तत्वाची भाशा करतात. आपल्या राज्यांत समाजाच्या निमण्या मनशा मेरेन सरकार पावतलें, अश्यो खबरो करतात. मात, गरिबांचें तांदूळ चोरपाच्या प्रकरणाचो क्रायम ब्रांच तपास करता आसतना दोतोर प्रमोद सावंत हांणी नागरी पुरवण अधिकाऱ्यांक तत्काळ दिल्ली क्लीन चीट हाचेर जायत्या लोकांनी अजाप उक्तायलें. फोंड्या क्रायम ब्रांच गुदांव तपासताले आनी पणजे मुख्यमंत्री क्लीन चीट दिवन मेकळे जाले. निदान तपास तरी पुराय जावपाक जाय आशिल्लो. हे क्लीन चिटीक लागून सरकारी यंत्रणेंतल्या प्रामाणीक अधिकाऱ्यांचेंय मनोबल सामकें हाल्लां.
आमचे राजकारणी जायते फावट भाशणांनी छत्रपती शिवाजी महाराजाचें उदाहरण दितात. महाराज आमचे आदर्श म्हूण बडायो मारतात. मात, शिवाजी महाराजाच्या काळांत रेशनकार्डांय नाशिल्लीं वा रेशन सोसायट्योय नाशिल्ल्यो. पूण, जनते मेरेन योग्य पद्धतीन धान्य पावताले. महाराजाच्या धान्याचें कोठार कोणें केन्ना लुटूंक ना. वेल्यान तांची धान्य कोठारांचेर इतली बारीक नदर आसताली की ते स्वता ताचो हिशोब घेताले. तांणी बरयिल्लीं पत्रांच आसात. शिवाजी महाराजां कडल्यान हाची देख घेवची आनी ह्या प्रकरणांतल्या गुन्यांवकारांक धरचे, तशेंच हाचे फुडें अशें घडचें न्हय म्हणून सरकारान जबाबदारीन वागचें, इतलेंच आंवडे.
विश्वनाथ नेने
9604039519
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
