भांगरभूंय | प्रतिनिधी
12 जाणांक अटक, 36 हजार रोख आनी 36 लाखांचो म्हाल जप्त
पणजी, प्रतिनिधी ः दोनापावला एका रिसोर्टांत चालू आशिल्ल्या बेकायदेशीर ऑनलायन कॅसिनोचेर गोंय पुलिसांनी मंगळारा मध्यानरातीं धाड घाली. ह्या प्रकरणांत 12 जाणांक अटक केलां. गोंय पुलीस गुन्यांव तपास फांट्याचे पुलीस निरिक्षक किशोर रामनन हांच्या फुडारपणा खाला ही धाड घाली. 36 हजार रोख आनी 36 लाखांचो म्हाल जप्त केलां.
दोनापावलाच्या रिसॉर्टांत ‘चान्सेस’ कॅसिनो बेकायदेशीर रितीन चलता अशीं म्हायती गुन्यांव फांट्याक मेळिल्ली. ते प्रमाण निरिक्षक किशोर रामनान हांच्या फुडारपणा खाल एक पंगड तयार केलो. मध्यान रातीं ह्या पंगडान कॅसिनोचेर धाड घाली. ह्या वेळार थंय धा लोक जुगार खेळटाले. तशेंच कॅसिनोचो वेवस्थापक आनी एक कर्मचारीय थंय आशिल्लो. ह्या पंगडान ह्या 12 जाणांक अटक करुन तांच्या कडल्यान लायव्ह कार्ड खेळपाचे 1 मेज, 6 लॅपटॉप, 1 लायव्ह कार्ड शफलर, 1 कार्ड स्कॅनर, 2 मॉनिटर, 1 कॅश चिप फ्लोट अशें 36 हजार रोख आनी 36 लाखांचो म्हाल जप्त केलां. गोंयच्या भौशीक जुगार कायद्याच्या कलम 3 आनी 4 खाला सगल्या दुबावितां आड गुन्यांव नोंद केला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
