दोगां दुबावितांची सुटका; न्यायालयाचो निवाडो

भांगरभूंय | प्रतिनिधी

हरमल घुंवळे वखदां प्रकरण

म्हापशें: मदलोवाडो, हरमला 15 लाखांच्या ड्रग्स प्रकरणांत युकेच्या नागरिका सयत अटक केल्ले वांगडी दुबावीत आरोपी मंदेश बांदोडकार (कांदोळी) आनी किंगस्ले इचेझोना इग्वेझे (नायजेरियन) ह्या दोगांक पुरावो नाशिल्ल्यान दोशमुक्त केलो. हो निवाडो उत्तर गोंय अतिरिक्त सत्र न्यायालयाचे न्यायाधीश एडगर फर्नांडीस हांणी दिलो.

फाटल्या 14 सप्टेंबर 2022 दिसा पेडणें आनी हणजूण पुलिसांनी मदलोवाडो हरमला दुबावीत आरोपी स्टिफन स्लोटवीनर (युके) हो विदेशी नागरीक रावत आशिल्ल्या घराचेर धाड घाल्ली. ह्या घरांतल्यान पुलिसांक 5.12 ग्राम गांजो, 17.7 ग्रामाच्यो 40 एक्सटसी गुळयो, 80 ग्राम एमडीएम, 1.1 ग्रामाच्यो 26 एलएसडी पेपर्स, 15.3 ग्रामाच्यो 26 एलएसडी कॅप्सुल्स हो वट्ट 15 लाख रुपयांचो ड्रग्स जप्त केल्लो. पुलिसांनी दुबावीत स्टिफन स्लोटवीनर हाका घुंवळे वखदां प्रतिबंधक कायदो कलम 20(ब)(2)(अ) आनी 22(क) खाला गुन्यांव नोंद करून अटक केल्ली.

उपरांत दुबावितान जबानी वेळार मंदेश बांदोडकार आनी किंगस्ले इचेझोना इग्वेझे हांचीं नांवां उक्तीं केलीं. ताका लागून ह्या प्रकरणांत ह्या दोगांकूय दुबाविताचे वांगडी म्हूण पुलिसांनी अटक केली.

दुबावीत स्टिफन हाका मंदेश बांदोडकार हाणें ह्या ड्रग्साची पुरवण केल्ली. जाल्यार दुबावीत मंदेश हाणें हो ड्रग्स किंगस्ले हाचे कडल्यान खरेदी केल्लो अशें पुलिसांनी पंचनाम्यांत नमूद केल्लें. तशेंच दुबावीत किंगस्ले हाचे रावते कुडीचेर पुलिसांनी जेन्ना धाड घाली, पूण थंय ताका कांयच सांपडलें ना.

जाल्यार दुबावीत बांदोडकार हाच्या घराची झडटी घेतली ना. तशेंच दुबावीत स्टिफन हाणें रोख रक्कम आनी गुगल पे वतीन दुबावीत मंदेश बांदोडकार हाका पयशे दिल्ल्याचें नमूद केल्लें. पूण ह्या अर्थीक वेव्हाराचो तपशील सादर केल्लो ना.

दुबावीत किंगस्ले हाका घुंवळे वखदां विरोधी पंगडाच्या पुलिसांनी ऑक्टोबर 2019 वर्सा धरून ताचे कडल्यान 15.980 ग्राम वजनाचो कोकेन जप्त केल्लो. हें ड्रग्स प्रकरण वयल्या प्रकरणा कडेन जोडूंक येना असो निश्कर्श न्यायालयान निवाड्या वेळार नोंद केलें.

दोनूय दुबावीत आरोपींची ह्या खटल्यांतल्यान सुटका केली. दोगांकूय दरेकी 20 हजार रुपया हमी रक्कम आनी तितल्याच रकमेच्या हमिदाराची हमी सादर करपाचो आदेश न्यायालयान दिलो.

मजगतीं, दुबावीत स्टिफन स्लोटवीनर हाचे आड वयल्या गुन्यांवांत आरोप निश्चीत करतले अशे निर्देशूय न्यायालयान दिल्यात. न्यायालयांत सरकारी पक्षा वतीन सरकारी वकील अ‍ॅड. मांद्रेंकार हांणी जाल्यार दुबाविताचे वतीन अ‍ॅड. एम. नाझारेथ आनी अ‍ॅड. एफ. डिसोझा हांणी युक्तिवाद केलो.