भांगरभूंय | प्रतिनिधी
वास्को, प्रतिनिधी: दाबोळे विमानतळार आयिल्ल्या निकेत तुरी (२१) ह्या प्रवाशाच्या पाकिटांत पिस्तुलाची गुळी मेळ्ळ्या. दाबोळी विमानतळ स्टेशनांत ताचे आड गुन्यांव दाखल केला. हे विशीं दाबोळी विमानतळार केंद्रीय उद्देगीक सुरक्षा दळाचे निरीक्षक सुरेंद्र रेड्डी हांणी कागाळ दिल्या.
बुलढाणा- महाराष्ट्रांतलो निकेत हो सोमारा विमानांतल्यान गोंयच्यान मुंबय वचपाक आयिल्लो.
एक्स रे सामान तपासणी प्रणालीच्या एटीआरएस मशीन क्रमांक चाराचेर दीपक अग्रवाल हे कामाक आशिल्ले. थंय डोमेस्टीक सिक्युरिटी होल्ड एरियाक निकेत हाच्या पाकिटांत पिस्तुलाची एक गुळी आशिल्ल्याचें कळ्ळें. ती कितल्या कॅलिबरची आसा हे कळूंक ना. ह्या वेळार ताचे कडेन आशिल्ली बॅगूय तपासपाक मागली तेन्ना ती तपासणे खातीर दिवपाक ताणें न्हयकार दिलो. ह्या वेळार केंद्रीय उद्देगीक सुरक्षा दळाचे पी. हरी हांणी ताचें पाकीट तपासलें.
ही बुलेट व्हरपा खातीर खंयचेच तरेचो परवानो नाशिल्ल्याचें ताणें सांगलें. देखून केंद्रीय उद्देगीक सुरक्षा दळान ताका ताब्यांत घेतलो. उपरांत ताका दाबोळी विमानतळ पुलिसांच्या ताब्यांत दिलो. हे विशीं सहाय्यक उपनिरीक्षक संतोष गांवकार फुडलो तपास करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
