भांगरभूंय | प्रतिनिधी
गरमेचे दीस सोंपून आतां थंडेच्या दिसांक सुरवात जावपाक लागला. थंडेच्या दिसांनी वेगवेगळे त्रास जातात. ओंठ फुटप वा तांकां कातरे पडप, ओंठ सुकप ह्यो समस्या थंडेच्या दिसांनी सगळ्यांकच जाता. ओठांची जतनाय घेवपा खातीर बाजारांत जायत्यो क्रीम, लीप बाम मेळटात. पूण, अशा सुक्या वा फुटिल्ल्या ओंठाचेरय जायते घरगुती उपाय आसात. हे घरगुती उपाय तुमचे ओंठ सैमीक रितीन मोव दवरपाक मजत करतात. तातूंत रसायन नासता.
म्होंव
म्होंव तुमचे ओंठ सैमीक रितीन मोव दवरपाक मजत करता. ओंठाचेर म्होंवाचो पातळ थर लावचो आनी कांय मिण्टांनी तो कोमट म्हणल्यार हुळहुळीत उदकान धुवचो. हाका लागून ओंठांची कात येना आनी तुमचे ओंठ मोव उरता.
खोबरेल तेल
खोबरेल तेल ओंठाक खूब फायदेशीर आसा. तें ओंठांक जाय तें पोशण दिवन ओंठांची जतनाय घेवपाचें काम करता. खोबरेल तेलाचे एक- दोन थेंब ओंठाचेर लायल्यार ओंठ हायड्रेट जाता आनी मोव जाता. दीसभरांत जेन्ना गरज दिसता तेन्ना खोबरेल तेल ओंठा लावपाक वापरूं येता.
एलोवेरा
एलोवेरांत (कांटेकुंवर) अँटीइम्फ्लेमेटरी गुणधर्म आसतात. तशेंच मॉइश्चरायझिंग घटक आसतात जे फुटिल्ल्या वा कात आयिल्ल्या ओंठांची जतनाय घेतात. एलोवेरा जेल वा एलोवेरा लिप बामचो पातळ थर ओंठाचेर लावचो. तो तुमचे ओंठ मोव दवरपाक मजत करता.
तंवशें
तंवश्यांत सैमीक रितीन उदक भरपूर आशिल्ल्यान तुमच्या सुक्या ओंठांक ती खूब फायदेशीर आसता. तिचीं पातळ कापां करून कांय मिण्टां ओंठाचेर भोंवडायात. हो प्रयोग दिसांतल्यान कितलेय फावट करूं येता.
गुलाबाच्यो पाकळ्यो
गुलाबाच्या पाकळ्यांत सैमीक रितीन तेलाचे प्रमाण आसता जें सुक्या वा फुटिल्ल्या ओंठांक उपेगी पडटा. कांय गुलाबाचीं पाकळीं घेवन तीं दुदांत वा ग्लिसरीनांत कांय वरां भिजत दवरचीं. उपरांत भिजल्लीं पाकळ्यो सामकी बारीक करुन ताची पेस्ट तयार करात. ही पेस्ट 15 मिनटां ओंठाचेर लावची आनी मागीर ओंठ धुवचे.
साकरे पसून तयार केल्लो स्क्रब
साकरे पसून तयार केल्लो हो स्क्रब वापरल्यार ओंठांची पाड जाल्ली कात काडून उडोवपाक मजत जाता आनी मागीर ओंठ मोव आनी बरें उरता. म्होंव वा खोबरेल तेलांत साकर भरसून पेस्ट तयार करात. ही पेस्ट ओंठार लावन मालिश करची. उपरांत मोमट उदकान ओंठ धुवचे.
ग्रीन टी
वापरिल्लीं ग्रीन टीचीं पोतीं ओंठां खातीर खूब फायदेशीर आसतात. ग्रीन टींत अँटीऑक्सिडेंट आसता जाका लागून ओंठांची जळजळ जायना. ग्रीन टी केले उपरांत पोती काडून थंड जावपाक दवरची. थंड जाले उपरांत कांय मिण्टां खातीर ही पोती ओंठाचेर लावची. हाका लागून ओंठांची जळजळ उणी जाता.
उदक
ओंठ सुकचे न्हय म्हूण एक बरो उपाय म्हणल्यार भरपूर उदक पियेवप. कुडींत योग्य प्रमाणांत उदक आसल्यार ओंठ सुकप, ओंठ फुटप, ओंठांची कात येवप सारकिल्ले त्रास जाय नात. देखून फावो त्या प्रमाणांत उदक पियेवप गरजेचें. तशें प्रत्येकान दिसाक उणेंच दोन लीटर तरी उदक पिवपाक जाय.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
