भांगरभूंय | प्रतिनिधी
पेडणें: तुयें पंचायत वाठारांतल्या सोणयें-पालयें ह्या भर लोकवस्तींत जेनिफर आनी एल्सी डिसोझा हांच्या घराचे गॅलरींत फांतोडेर साडेपांच वरांचेर बिबट्या वागान प्रवेश करून गॅलरींत बशिल्ल्या सुण्याचेर हल्लो केलो. सुणो आड्डता म्हणून जेनिफर घरा भायर आयली. त्या वेळार दाराच्या आवाजाक लागून वागान त्या सुण्याक थंयच सोडून पळ काडलो.
तशीच घडणूक एल्सी हांचे गॅलरींत पयर घडली. बिबट्यान सुण्याक अर्द्या परस चड खावन उडयलो. बोवाळ जातकूच बिबट्यान धांव मारली. ही घडणूक सेगीत दोन दीस भर वस्तींत घडिल्ल्यान लोकां मदीं भिरांत पातळ्ळ्या.
हांगासरल्या बायलांनी आपली प्रतिक्रिया दितना म्हणलें, आमचे घरकार भायल्या गांवांनी कामाक आसतात. आशिकुशीक ल्हान भुरगीं आसात, आनी भर वस्तींत हो बिबटो येवन आमच्या भुरग्यांक बी व्हरचो ना मूं? अशी भिरांत उक्तावन ह्या बिबट्या वागाचो रोखड्या रोखडो बंदोबस्त करचो अशी मागणी केली. विकासाच्या नांवार दोंगर माळ राना वयलीं झाडां-झोंपा कापतात ताका लागून बिबटे लोकवस्तींत येत आशिल्ल्याचें बायलांनी म्हणलें.
थळावे पंच वांगडी उदय मांजरेकार हांणी म्हणलें, रानवटी जनावरां रानांतल्यान लोकवस्तींत येतात, आनी लोकवस्तींतल्या सुण्यांचो जीव घाताक आयिल्लो आसतना आतां मनशाचोय जीव घाताक आयला.
फाटल्या स वर्सां सावन तुयें वाठारांत बिबट्या वागाचो वावर वाडिल्ल्याचें चित्र दिसून येता. वेळावेळार रान खात्याक ह्या बिबट्या वागाचो बंदोबस्त करपा खातीर जाग्याजाग्यार सीसीटीव्ही कॅमेरे लावन वाग खंय वता हाची तपासणी करपाची मागणी केल्ली, पूण रान खात्यान आयज मेरेन कसलेच तरेच्यो हालचाली करूंक नाशिल्ल्याचें मांजरेकार हांणी सांगलें.
फक्त पांदरो लावन वाग पांदऱ्यांत येवचो ना हे खातीर रान खात्याच्या अधिकाऱ्यांनी वागाक धरपा खातीर ठोस उपाय येवजण करची अशी मागणी ह्या वेळार उदय मांजरेकार हांणी केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
