तारवट्यांची पेन्शन अधिसुचीत करपा खातीर विधानसभेंत विचारतलों प्रस्न

भांगरभूंय | प्रतिनिधी

आलेक्स रेजिनाल्ड: मडगांवां संवसारीक तारवटी दिसा निमतान कार्यावळ

मडगांव: तारवट्यां खातीर गोंय सरकारान तयार केल्ली तारवटी पेन्शन येवजण अधिसुचीत करप, तशेंच ती येवजण कायमस्वरुपी करप हे खातीर विधानसभा अधिवेशनांत प्रस्न विचारतलों. अधिसुचोवणी जारी करपा खातीर सरकारा कडेन चर्चा करतलों अशें आमदार आलेक्स रेजिनाल्ड हांणी सांगलें.

मडगांवां रवींद्र भवनांत गोवन सीमन असोसिएशना कडल्यान संवसारीक तारवटी दिसा निमतान कार्यावळीचें आयोजन केल्लें. ह्या वेळार संस्थेचे अध्यक्ष फ्रँक व्हिएगश, आमदार आलेक्स रेजिनाल्ड, अनिवासी भारतीय आयोगाचे आयुक्त नरेंद्र सावयकार आनी संस्थेचे हेर पदाधिकारी हाजीर आशिल्ले.

1919 वर्सां मुंबय ते लंडन ह्या मार्गार एसएस लॉयल्टी ही बोट सुरू जाल्ली. ते बोटीर काम केल्ल्या तारवट्यांचो ह्या वेळार भोवमान केलो. तारवट्यांच्यो सगल्यो समस्या सुटिल्ल्यो नात. पूण गोंय सरकारा कडल्यान ज्यो शक्य आसात त्यो समस्या सोडोवपाचो यत्न जायत आसा. अनिवासी भारतीय आयोगांचेंय तारवट्यांक सदांच सहकार्य मेळत आसा. तारवट्यां खातीर तयार केल्ली पेन्शन येवजण अजून लेगीत अधिसुचीत केल्ली ना. ती रोखडीच अधिसुचीत जावची हे खातीर यत्न करतले अशेंय आमदार रेजिनाल्ड हांणी सांगलें.

एमपीटीच्या नव्या क्रुझ टर्मिनलाचे सुवातेर जीएसएआय क थोडी सुवात उपलब्ध करून दिवची. पोर्ट वेल्फेर समिती कडल्यान जीएसएआय वांगड्यांक गरजेची म्हायती दिवची. तेच बरोबर तारवट्यांक तांच्या कुटुंबांक बोट दाखोवपा खातीर परवानगी दिवची अश्यो मागण्यो दिवच्यो. कांय सुरक्षेच्या कारणा खातीर परवानगी न्हयकारूं येता, पूण तारवट्यांच्या कुटुंबांक बोट दाखोवपाची परवानगी दिवची. तारवट्यांक विवीध समस्यांक सामकार वचचें पडटा. तारवटी म्हयन्याचे म्हयने बोटीर रावतात आनी राज्याचे अर्थीक वाडीक लेगीत तांचो हातभार लागता. तांच्या समस्यां कडेन राज्य सरकार, केंद्र सरकारान लक्ष दिवचें अशी मागणी गोवन सीमन असोसिएशन ऑफ इंडियाचे अध्यक्ष फ्रँक व्हिएगश हांणी केली.

तारवटी हो संवसारीक अर्थीक उलाढालीचो मोटो घटक आसा. संवसारीक वेपाऱ्याचो मुखेल आधार तारवटीच आसा. संवसारांतली पांचव्या क्रमांकाची भारतीय अर्थवेवस्था आसून ते खातीर तारवटी लोकांचोय हातभार आसा अशें मत आदले खासदार नरेंद्र सावयकार हांणी उक्तायलें.