भांगरभूंय | प्रतिनिधी
तिरंग्या वयल्यान कॅप्टन विरियातो हांचेर टिका; काँग्रेसीचीय परतून जाप
भांगरभूंय । प्रतिनिधी
पणजीः संविधान विरोधी विधान केल्ल्या प्रकरणांत काँग्रेसीचे दक्षीण गोंयचे उमेदवार कॅप्टन विरियातो फर्नांडीस हांचे सयत काँग्रेस फुडाऱ्यांचेर भाजपा फुडाऱ्यांनी टिका करपाचें सत्र चालूच दवरलां. तातूंत आतां कॅ. विरियातो हांणी सेंट जासिंतो जुंव्यार तिरंगो हुबोवपाक हरकत घेतिल्ली, असो दावो भाजप प्रदेशाध्यक्ष सदानंद शेट तानावडे हांणी बुधवारा केलो. जाल्यार तानावडे हांचो दावो फटीचो आसा, तांणी मध्यस्थी केल्ल्यानूच थंय तिरंगो हुबयलो, अशी परती जाप काँग्रेस प्रदेशाध्यक्ष अमीत पाटकार हांणी दिल्या.
बुधवारा पणजेच्या पक्ष कार्यालयांत घेतिल्ले पत्रकार परिशदेंत उलयतना तानावडे हांणी सांगलें, गोंयकारांचेर संविधान थापलें, अशें विधान करपी कॅ. विरियातो फर्नांडीस हे दुटप्पी आसात. फर्नांडीस हे आपूण नौदळांत आशिल्ले अशें सांगतात, मात तांणी हे आदींय हरकत घे सारकीं विधानां केल्यांत. 15 ऑगस्टाक वास्कोच्या सेंट जासिंतो जुंव्यार बारताचो तिरंगो हुबोवपाक तांणी हरकत घेतिल्ली. ते उपरांत एका फादरान शिवाजी महाराजा संबंदांत वायट उतरां वापरिल्लीं, त्या वेळार लेगीत फर्नांडीस हांणी तांचें समर्थन केल्लें. फर्नांडीस गोंयांतलो एकचार इबडावपाक सोदता, अशी टिका तानावडे हांणी केली.
हाका जाप दितना अमीत पाटकार हांणी सांगलें, सेंट जासिंतो जुंव्यार 13 ऑगस्टाक भारतीय नौदळाचे अधिकारी खणटाले. थलाव्या नुस्तेंकारांनी ताका खर हरकत घेतली. ते उपरांत 14 ऑगस्टाक कांय राजकारण्यांनी थंय धांव घेतली. ताका लागून जुंव्यार बोवाळ जालो. नौदळाच्या वरिश्ठ अधिकाऱ्यान कॅ. विरियातो फर्नांडीस हांकां हे विशींची म्हायती दिवन मध्यस्थी करपाक सांगलें. ते उपरांत कॅ. विरियातो फर्नांडीस 14 ऑगस्टाक ताकतिकेन जुंव्यार गेले आनी दनपारां तांणी थंय भारताचो तिरंगो हुबयलो. दक्षीण गोंयांत भाजपाची हार निश्चीत आसा. तेच खातीर तानावडे चुकीचीं विधानां करून लोकांची दिशाभूल करपाचो यत्न करता. पूण लोक तांच्या विधानांक गांभिर्यान घेवचे नात. गोंय मुक्तीच्या भांगरा महोत्सवी वर्सा निमतान आयोजीत कार्यावळीक स्वातंत्र्य सैनिकांक आमंत्रण दिवंक नाशिल्ल्या सरकार पक्षाच्या प्रदेशाध्यक्षान आमकां स्वातंत्र्य सैनिकांचो सन्मान आनी देशप्रेम शिकोवचें न्हय, अशें पाटकार हांणी सांगलें.
संकल्प आमोणकारा वतीन कागाळ
संविधान गोंयकारांचेर थापलां, अशें विधान करून कॅ. विरियातो फर्नांडीस हांणी देशाचो आनी संविधानाचो अपमान केला. ताका लागून तांचेर राष्ट्रीय सन्मान कायदो 1971 खाला गुन्यांव नोंद करचो, अशी कागाळ भाजपाचे आमदार संकल्प आमोणकार हांणी बुधवारा कोलवें पुलिशेंत केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
