भांगरभूंय | प्रतिनिधी
म्हापशें: सोरो पियेवन गाडी चलोवप हें सद्या पर्यटकां कडल्यान सदचेंच जालां. हाका लागून जिवघेणे अपघात घडत आसात आनी जीव व्हगडावपाचो वेळ लोकांचेर आयला. निश्काळजीपणाक लागून जाल्ल्या अपघातांक मोटार चालक जितले जापसालदार आसात, तितलेच पुलीस आनी येरादारी खातें दोशी आशिल्ल्याचो आरोप हळदोणेंचे आमदार अॅड. कार्लुस फेरेरा हांणी केलो.
ह्या ड्रंक अॅण्ड ड्रायव्ह विशीं अॅड. फेरेरा हांणी गोंयचे मुख्य सचीव, गृह सचीव, येरादारी सचीव, पुलीस म्हासंचालक आनी येरादारी खात्याच्या संचालकाक पत्र बरोवन सोरो पियेवन गाडी चलोवप्यां आड खर कारवाय करपाची मागणी केल्या.
मद्यधुंद स्थितींत मोटार चलोवपी चालकांची वेळावेळार तपासणी जायत नाशिल्ल्यानूच हे प्रकार वाडत आसात. पुलीस तशेंच येरादारी यंत्रणे कडेन गरजेचे ब्रिथलायझर कीट नात. तशेंच शेनवारा वागातोरा घडिल्ल्या रिसॉर्टाचे बायल धनयेच्या अपघाती मरण प्रकरणांतलो दुबावीत मोटार चालक सचीन कुरूप (पुणें) हाचो आल्कोहोल अहवाल दोन दिसां भितर येतलो अशें हणजूण पुलीस स्टेशनाच्या निरिक्षकान सांगिल्लें. हाचोच अर्थ हणजूण पुलीस यंत्रणे कडेन आल्होकोल मिटर नात.
येरादारी पुलिसां कडेन आल्कोहोल मिटर उपलब्ध करून दिल्यात. तशेंच पुलिसांक लेगीत आल्कोहोल मिटर उपलब्ध करून दिवचे. येरादारी पुलिसांनी रातच्या वेळार मोटार चालकांची आल्कोहोल चांचणी करप गरजेची आसा. कांय अपघाती घडणुको घडले उपरांतूच सक्रीयपणान कांय दिसां खातीर अल्कोहोल चांचणी मोहीम राबोवप चुकीचें आसा. अश्यो चांचणी वेळावेळार आनी दर फावटी जावप गरजेचें आसा अशें मत अॅड. कार्लुस हांणी उक्तायलें.
जे सुवातेर नखेत्री हॉटेलांनी पार्ट्यो जातात थंय पुलिसांक नेमून ड्रंक अॅण्ड ड्रायव्ह हाच्यो चांचणी घेवप गरजेचें आसा. अशा सुवातांनी पुलीस दवरल्यार लोकां मदीं भिरांत उरतली आनी हॉटेल थळार येवपी गटांतलो मनीस लेगीत सोरो पियेवचो ना अशें फरेरा हांणी म्हणलें.
मजगतीं, रस्त्यांचेर स्टंटबाजी करप्यांक लागून हेरांचो जीव घाताक येता. हाका लागून अशा लोकांचेरूय पुलिसांनी खर कारवाय करची अशी मागणी अॅड. फेरेरा हांणी केली. तशेंच सरकार आनी संबंदीत खात्यान दक्ष रावपाची गरज आसा. कारण हालींच्या काळांत सोरो पियेवन गाडी चलोवप हें फॅशन जालां. हाचो परिणाम खूबशे फावटी अपघात घडटात आनी निश्पाप लोकांचो बळी वता.
ताका लागून गोंय हें पर्यटक आनी हेरां खातीर सुरक्षीत सुवात ना असो चुकीचो संदेश वतलो. हे प्रकार बंद जावपा खातीर कायद्याची खर अंमलबजावणी जावप गरजेची आसा. हे खातीर सगलीं पुलीस स्टेशनां, आरटीओ कचेरी हांकां अल्कोहोल मिटर उपलब्ध करून दिवचे. वेळावेळार अल्कोहोल चांचणी रस्त्यार जावच्यो. सोरो पियेवन मोटार चलोवप्यांचो वाहन परवानो तत्काळ निलंबीत करचो. तशेंच ड्रंक अॅण्ड ड्रायव्हींग करीत आसल्यार मोटार चालकाचेर खुनाचो यत्न केल्ल्याच्या आरोपा खाला भादंसंच्या 307 कलमा खाला गुन्यांव नोंद करचो अशी मागणी अॅड. फेरेरा हांणी ह्या निवेदनांतल्यान केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
