डेंग्यू पातळटा: दुयेंतीं मदीं वाड जावपाची शक्यताय
भांगरभूंय | प्रतिनिधी
पणजी, प्रतिनिधी : पोरूंचे तुळेंत राज्यांत अंदूं डेंग्यूचें दुयेंती उणे जाल्यात. पूण, अनियमीत पावसाक लागून फुडल्या कांय दिसांनी डेंग्यूचे दुयेंती वाडपाची शक्यताय आसा. शार वाठारांनी फ्लॅटां भायर फ्लावर्स पॉट, मनिप्लांट, लोटस प्लांट तशेंच फ्रिजाक लागून डेंग्युच्या दुयेतींत वाड जाता. ह्या सगळ्यांनी सांठून उरिल्ल्या उदकांत डेंग्युंची जळारां जातात आनी ती त्या कुटुंबाक माल थारतात.
भलायकी खात्यांतली संसर्गजन्य दुयेंसांची तज्ज्ञ डॉ. कल्पना महात्मे हांणी फाटल्या वर्सा जानेवारी ते जुलय ह्या काळांत राज्यांत डेंग्यूचे १४७ दुयेंती सांपडिल्ले अशें सांगलें. अंदूं ह्याच काळांत १०० दुयेंती मेळ्ळ्यात. जाल्यार फाटल्या वर्सा जुलयांत ४७ जाणांक डेंग्यू जाल्लो. जाल्यार अंदूं ते ३० चेर पावल्यात. फाटल्या वर्सा परस अंदूं ह्या दुयेतींचो आंकडो देंवला. पूण ऑगस्टांत दुयेतींचो आंकडो वाडतूच आसा. सध्या कांदोळी, वास्को, कुठ्ठाळे, चिंबला, सांताक्रूज, ताळगांव आनी मडगांव ह्या वाठारांत डेंग्युच्या दुयेतीं मदीं वाड जातना दिसता.
शारी वाठारांत डेंग्यूच्या दुयेंती मदीं वाड जावपाक फ्लॅटा भायर सवरिल्ल्या फ्लॉवर्स पॉट, मनिप्लांट, लोटस प्लांट कारण थारता. हातूंत सांठून उरिल्ल्या उदकाक लागून डेंग्यु जळारांची पैदास वाडून ताचो फटको संबंदीत कुटुंबाक बसता. गांवगिर्या वाठारांतली कांय कुटुंबां उदक सांठोवपा खातीर घरा भायर बॅरलां तशेंच हेर वस्तू दवरतात. तातूंतय जळारां तयार जावन ह्या डेंग्यु सारकिल्ल्या दुयेंसाक आमी आयतो येवकार दितात. ताका लागून ह्या सगळ्या गजालींची नागरिकांनी जतनाय घेवची असो उलो तांणी मारलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
