भांगरभूंय | प्रतिनिधी
भांगरभूंय । प्रतिनिधी
वास्कोः बिर्ला- झुवारीनगर हांगा झुवारीनगर पुलीस स्टेशना फाटल्यान सांकवाळ कोमुनिदाद जमनींत अतिक्रमण करून बांदल्ल्या 64 घरांतली सुमार 18 घऱां बुधवारा (29 नोव्हेंबर) दिसभरयां मातयेभरवण केलीं. बाकीच्या बांदकामांचेर कारवार चालूच आसतली अशें सांकवाळ कोमुनिदादचो अध्यक्ष प्रताप म्हार्दोळकारान सांगलें. बांदकामां मोडटना कायदो आनी सुवेवस्थेचो प्रश्न उप्रासचो न्हय हे खातीर व्हडा प्रमाणां पुलीस बंदोबस्त दवोरल्लो.
सांकवाळ कोमुनिदादच्या सर्वे नंबर 154-1 आनी 901 हे जमनींत अतिक्रमणां करून लोकांनी सुमार 64 बांदकामां केल्यांत. ती मोडून वडोवपाची मागणी कोमुनिदाद वेवस्थापकीय समितीन संबंदीत सरकारी यंत्रणे कडेनकेल्ली मात कसलीच कारवाय जायनाशिल्ली. हाका लागून कोमुनिदाद अॅटर्नी जयेश फडते हांणी मुंबय उच्च न्यायालयाच्या गोंय खंडपिठांत याचिका सादर करून बांदकामां मोडून वडोवपाचो आदेश दिवपाची मागणी केल्ली. खंडपिठान मुरगांव नियोजन आनी उदरगत प्राधिकरणाचो वांगडी सचीव आनी पंचायत उपसंचालकाक बांदकामां संबंदी अहवाल सादर करपाचो आनी कारवाय करपाचो आदेश दिल्लो. दक्षीण गोंय कोमुनिदाद प्रशासकान पळोवणी केल्या उपरांत कोमुनिदाद जमनीत अतिक्रमणां केल्ल्याचें स्पश्ट जाल्ल्यान ती मोडून वडोवपाची वेवस्था करपाची मागणी केल्ली. उपविभागीय दंडाधिकारी आनी अतिक्रमणां हटाव पंगडाच्या उदय प्रभुदेसाय हाणे ती बांदकामां मोडपाचो आदेश जारी केल्लो. ते प्रमाण बुधवारा ही कारवाय सुरू केली.
बांदकामा मोडटले हें स्पश्ट जाल्ल्यान त्या घरांत रावतल्यानी आपलें सामान भायर काडपाक सुरवात केली. उपरांत जेसीबी वरवीं तीं घरां मोडपाक सुरवात जाली. दिसभरयां 18 घरां मोडलीं. पयली हे सुवातेर फकत दोन तीन बांदकामां केल्ली. कोमुनिदाद जमनींत बांदकामां करनाकात अशें आमी सांगल्लें. मात ताचे कडेन आडनदर केली. फाटल्या दोन वर्सांत सुमार 64 बांदकामां जालीं. आमी सर्वे करपाक गेल्ले कडेन कांय जाणांनी आमकां गाळयो सोंवल्यो आनी धमक्यो दिल्यो. काणे तरी बांदकाम केल्ल्या लोकां कडल्यान पयशे घेवंन कोमुनिदाद जमनीर तांकां बांदकामां करपाक सांगल्लें. तांची घरां मोडल्ल्यान आतां तांचे लुकसाण जालां अशें प्रताप म्हार्दोळकारान सांगलें.
सांकवाळ कोमुनिदाद जमनीर बांदकामां केल्ल्या 32 जाणांची नांवा मेळटात. जांची नांवां मेळनात अशा 32 जाणांनी घरां बांदल्यांत पूण ते थंय रावपाक आयले नात. 64तली चार घरा स्लॅबाचीं आसात. काय घरां चिऱ्यांनी बांदल्यात जाल्यार काय फकत शिमिटाच्या पत्र्यांचो वापर करून बांदल्यांत. कांय घरांक लायट आनी उदकाची कनेक्शनां दिल्यांत अशी म्हायती म्हार्दोळकारान दिली. बेकायदेशीर घरांक लायट आनी उदकाची कनेक्शनां दिवपाक जायना. ही कनेक्शनां मेळल्ल्यान घरा कायदेशीर जालीं असो घऱ धनयांचो गैरसमज जाल्लो. आमी जरी अतिक्रमण करून घरां बांदली तरी तीं कोणूच मोडपाक शकचो ना अशें तांकां दिसल्लें. मात बांदकामां मोडपाक सुरवात जातगीर तांकां धपको बसला अशें म्हार्दोळकारान सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
