भांगरभूंय | प्रतिनिधी
वर्साक 28,678 दुयेंतीचो गोमॅकॉचेर पडटा ताण
विधानसभेंत भलायकी मंत्र्यांची लेखी जापेंत म्हायती
पणजीः फाटल्या साडेतीन वर्सांच्या काळांत उत्तर आनी दक्षीण गोंय जिल्हो हॉस्पिटलांतल्यान वट्ट 28,678 दुयेंतींक फुडल्या उपचारा खातीर बांबोळे गोंय वैजकी म्हाविद्यालय (गोमॅकाँत) धाडिल्ल्याची म्हायती भलायकी मंत्री विश्वजीत राणे हांणी अतारांकीत प्रस्ना वयले जापेंत दिल्या.
आयसीयू, सीसीयू कॅर, आपत्कालीन डायलिसीस तशेंच एमआरआय, सीटी स्कॅन ह्या सारक्या म्हत्वाच्या कारणांक लागुनूच जिल्हो हॉस्पिटलांतल्यांन दुयेंतींक गोमॅकाँत धाडटात, अशेंय राणे हांणी जापेंत म्हणलां.
आमदार दिगंबर कामत हांणी विधानसभा अधिवेशनांत हो प्रस्न उपस्थीत केल्लो. 2020 ते आतां मेरेन उत्तर गोंय जिल्हो हॉस्पिटलांतल्यान 16,119, जाल्यार दक्षीण गोंय जिल्हो हॉस्पिटलांतल्यान 12,559 दुयेंतींक फुडल्या उपचारा खातीर गोमॅकाँत धाडले, अशें मंत्री राणे हांणी जापेंत नमूद केलां. दक्षीण गोंय जिल्हो हॉस्पिटलांतल्यान 2020 सावन दरेका वर्सा कितल्या दुयेंतींक गोमॅकाँत धाडटात हाची सविस्तर आंकडेवारी आमदार कामत हांणी मागिल्ली. हे विशीं मंत्री राणे हांणी सादर केल्ले आंकडेवारी प्रमाण, 2020 त 2,992, 2021 त 3,717, 2022 त 3,885 दुयेंतींक गोमॅकाँत उपचारा खातीर धाडले. जाल्यार अंदूं जून मेरेन 1,965 दुयेंतींक फुडल्या उपचारा खातीर गोमॅकाँत धाडिल्ल्याची म्हायती जापेंत नमूद केल्या.
दुयेंतींच्या जिविताक धोको
जिल्हो हॉस्पिटलांत गरजेच्यो साधनसुविधा नात. ताका लागून गंभीर स्थितींत आशिल्ल्या दुयेंतींक थंयच्यान गोमॅकाँत धाडटात. अशा वेळार खूबशा दुयेंतींक वाटेत मरण येवपाच्यो घडणुको घडल्यात. फाटल्या कांय वर्सांत अशा तरेचीं प्रकरणां उक्ताडार आयले उपरांत विरोधी पक्षांनी सरकाराक धारेर धरिल्लें. पूण मंत्री विश्वजीत राणे हांणी सादर केल्ले आंकडेवारी प्रमाण, जिल्हो हॉस्पिटलांतल्यान दुयेंतींक गोमॅकाँत धाडपाचें प्रमाण दरवर्सा वाडतूच आशिल्ल्याचें दिसून येता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
