भांगरभूंय | प्रतिनिधी
दोडामार्गः दोडामार्ग-बेळगांव-कोल्हापूर ह्या तीन शारांक जोडपी तिळारी घांटार 35 वर्सां पिरायेचे एके अनवळखी बायलेची कुशिल्ली कूड मेळ्ळी. वीज निर्मिती उदकाच्या लायनी वटेन वचपी रस्त्या कुशीक आशिल्ल्या दाट रानांत ही कूड मेळ्ळी. हे बायलेचो खून करून पुरावे नश्ट करपाच्या हेतान तिची कूड अशा निर्जन दाट रानांत उडयल्ल्याची शक्यताय आसा.
मेळिल्ले म्हायती प्रमाण, कांय नागरिक तिळारी वीज निर्मिती उदकाच्या लायनी वटेन वचपी रस्त्या वयल्यान वतना तांकां कुशिल्लो बुरसो वास आयलो. हाका लागून तांकां दुबाव आयिल्ल्यान तांणी भोंवतणच्या वाठारांत रानांत सोद घेतलो आनी तांकां एक कुशिल्ली कूड मेळ्ळी. हे घडणुकेची रोखडीच चंदगड पुलिसांक म्हायती दिली. चंदगड पुलीस स्टेशनाचे उपनिरिक्षक आकाश भिंगारदिवे आपल्या पंगडा सयत घडणूक सुवातेर पावले आनी पंचनामो करून कूड ताब्यांत घेतली.
पुलिसांनी दिल्ले म्हायती प्रमाण, मेल्ल्या बायलेची पिराय 30 ते 35 वर्सां मदीं आसतली. तिच्या आंगार मोरपीस-भांगरा रंगाची साडी, तांबडो-भांगरा रंगाचो ब्लॉवज आनी पांयांत पैंजणा आसात. कूड पुरायपणान कुशिल्ली आशिल्ल्यान वळख पटप खूब कठीण आसा. प्राथमीक अदमासा प्रमाण मेल्ली बायल शेजारच्या कर्नाटक राज्यांतली आसपाची शक्यताय आसा. चंदगड पुलिसांनी फाटल्या कांय दिसांनी आपल्या हद्दीत तशेंच शेजारच्या पुलीस स्टेशनांनी बेपत्ता जाल्ल्या बायलां विशीं आशिल्ली म्हायती एकठांय करपाक सुरवात केल्या. कूड पोस्टमॉर्टमा खातीर धाडल्या. पुलीस फुडलो तपास करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
