गुजरात टायटन्स फायनलींत

भांगरभूंय | प्रतिनिधी

गुजरात टायटन्सान तिसरे खेपे आयपीएलाचे फायनलींत सुवात मेळयली. ताणें काल जाल्ले क्वॉलिफायर दोनांत आदलो वस्ताद राजस्थान रॉयल्साक 7 विकेटींनी हारायलो. फाल्यां जावपी फायनलींत गुजरात पंगड सध्याचो वस्ताद रॉयल चॅलेंजर्स बंगळुरू आड खेळटलो.
राजस्थानान पयली बॅटींग करतना 6 विकेटी व्हगडावन 214 धांवड्यो केल्ल्यो. गुजरातान 18.4 ओव्हरींनी 3 विकेटी व्हगडावन 219 धांवड्यो करून जैत जोडलें. मुखेली शुभमन गिलान 104 धांवड्यांची खेळी केली. साई सुदर्शनान 58 धांवड्यो केल्यो.

ते पयली युवा बॅट्समन वैभव सूर्यवंशीच्या 96 धांवड्यांची स्फोटक खेळी आनी अखेरच्या ओव्हरींनी डोनोव्हन फरेरान काडिल्ल्या आक्रमक बॅटिंगे नेटार राजस्थान रॉयल्सान निर्धारीत 20 ओव्हरींनी 6 विकेटी व्हगडावन 214 धांवड्यो केल्यो.

मुल्लानपूरांतल्या महाराजा यादवेंद्र सिंग आंतरराष्ट्रीय स्टेडियमाचेर राजस्थान रॉयल्सान टॉस जिखून पयली बॅटींग करपाचो निर्णय घेतलो. पूण, ताची सुरवात बरी जाली ना. ओपनर यशस्वी जयस्वाल फक्त 1 धांवडी करून मोहम्मद सिराजाचो बळी थारलो. पूण, ते उपरांत 15 वर्सां पिरायेच्या वैभव सूर्यवंशीन गुजरातच्या बॉलांचेर प्रतिहल्लो केलो.

एलिमिनेटर मॅचींत 97 धांवड्यो करपी वैभवान काल परतून एकदा आक्रमक बॅटींग केली. ताणें फक्त 47 बॉलांनी 96 धांवड्यांची खेळी केली. हातूंत आठ चवक्यांचो आनी सात सक्यांचो आस्पाव आशिल्लो. ताका फक्त चार धांवड्यांनी शेंकडो चुकलो. पूण, ताचे बॅटिंगेक लागून राजस्थानाक व्हड धांवसंख्या उबारपाक मुळावण घालून दिलें. ताणें अंदूंच्या हंगामांत 700 धांवड्यांचो टप्पो लेगीत हुपलो. मजगतीं, मुखेली रियान पराग (11) आनी ध्रुव जुरेल (7) सवाय भितर बाद जाले.

मदले फळयेंतलो अणभवी रवींद्र जडेजान 35 बॉलांनी 45 धांवड्यांची संयमी बॅटींग केली. हॅमस्ट्रिंगच्या त्रासाक लागून ताका 34 धांवड्यांचेर कांय काळा खातीर ‘रिटायर्ड हर्ट’ जावन मैदाना भायर वचचें पडिल्लें. उपरांत तो परतून बॅटिंगेक आयलो. 17 ते 19वे ओव्हरींनी गुजरातान अचूक बॉलींग करून राजस्थानाच्या धांवड्यांक ब्रेक लायलो. जेसन होल्डरान 27 धांवड्यो दिवन 2 विकेटी घेतल्यो. पूण, 20वे ओव्हरींत डोनोव्हन फरेरान मॅचीचें चित्रच बदल्लें. ताणें रशीद खानाचे बॉलिंगेचेर सेगीत चार सके मारून 27 धांवड्यो केल्यो. फरेरान फक्त 11 बॉलांनी नाबाद 38 धांवड्यो केल्यो. ताणें दोन चवके आनी चार सके मारले.