भाजपचे बसकेंत बोवाळ

भांगरभूंय | प्रतिनिधी

नोकर भरती आयोगाक आमदारांची हरकत

मतदारसंघांतल्या कामा वयल्यान किल्लोस

वेंचणुके विशीं, मंत्रीपदा विशीं चर्चा ना

भांगरभूंय । प्रतिनिधी

पणजी : आमदार, मंत्र्यांचे बसकेंत नोकर भरती वयल्यान बोवाळ जावन आमदारांनी नोकर भरती आयोगाक हरकत घेतली. आमदार डॉ. देविया राणे, डिलायला लोबो हांणी नोकर भरती आयोगा वतीन करिनासतना ती पयली भशेन खात्या वतीन करपाची मागणी केली. सरकारी नोकऱ्यांत सगल्या मतदारसंघांक समान संद मेळपाक जाय, अशें मत आमदारांनी उक्तायलें.

सत्ताधारी आमदार, मंत्र्यांची बसका शुक्रारा पणजेच्या हॉटेलांत जाली. मुख्यमंत्री डॉ. प्रमोद सावंत आनी प्रदेश भाजप अध्यक्ष दामू नायक हांच्या फुडारपणा खाला ही बसका जाली. केंद्रीय मंत्री श्रीपाद नायक आनी वीजमंत्री तशेंच मगोचे आमदार सुदिन ढवळीकार माचयेर आशिल्ले. दरेका मतदारसंघांतल्या उदरगतीच्या कामांचे स्थितीचेर बसकेंत चर्चा जाली. शिवोली मतदारसंघांत खूबश्या वाठारांनी उदकाचो उणाव आसा. उदकाचो प्रस्न सुटावो जावंक ना, अशें डिलायला लोबो हांणी सांगलें.

रस्त्यांची तशेंच हेर कामां वेळांत पुराय जायना, अशी समस्या आमदारांनी मांडली.

सरकारी नोकर भरती कर्मचारी भरती आयोगा वतीन सुरू जाल्या. अंदूं आतां मेरेन 1500 नोकऱ्यांच्यो जायराती जारी जाल्यात. आनीक 3500 नोकऱ्यांच्यो जायराती जारी जावपाच्यो आसात. कांय मतदारसंघांक चड सरकारी नोकऱ्यो मेळटात जाल्यार कांय मतदारसंघांक सामक्योच उण्यो नोकऱ्यो मेळटात. संबंदीत खात्याचे नोकर भरतींत संबंदीत मंत्र्यांचो कसलोच अधिकार वा नियंत्रण उरना, अशेंय एका मंत्र्यान सांगलें. कर्मचारी भरती आयोगा वतीन नोकर भरती करपाक चडशा आमदारांचो विरोध आसा, ही गजाल बसकेंत जाणावल्याची म्हायती गोपांनी दिली. आमदार डॉ. देविया राणे आनी डिलायला लोबो हांणी हो प्रस्न विस्तृतपणान मांडलो.

म्हजें घर येवजणे आड कोमुनिदादी न्यायालयांत गेल्ल्यान येवजणेक आडखळ निर्माण जावप शक्य आसा, अशें मत काय आमदारांनी मांडलें.

उदरगतीचेरूच चर्चा : दामू नायक

नोकऱ्यो तशेंच प्रकल्प पुराय जावपाक उशीर जाता, अशो बारीक बारीक समस्या आमदारांनी बसकेंत मांडल्यो. मात ही बसका मतदारसंघांतले उदरगतीची स्थिती जाणून घेवपा खातीर आशिल्ली. दर तीन म्हयन्यांनी बसका जाता. हाचे पयलीं मार्चांत बसका जाल्ली. खंयच्या मतदारसंघांत कितलीं कामां पुराय जाल्यात, कितली उरल्यांत, ताची म्हायती मुख्यमंत्री तशेंच हेर फुडाऱ्यांक मेळ्ळी, अशें प्रदेश भाजप अध्यक्ष दामू नायक हांणी बसके विशीं उलयतना सांगलें.

बसकेंत वेंचणुके विशीं कसलीच चर्चा जावंक ना. मंत्रीपदा विशीं लेगीत चर्चा जावंक ना, अशें आमदार डिलायला लोबो हांणी सांगलें. प्रदेश अध्यक्ष दामू नायक हांणी लेगीत मंत्रीपदा विशीं चर्चा जावंक नाशिल्ल्याचें सांगलें.

दिगंबर, विश्वजीत, बाबूश गैरहाजीर

भौशीक बांदकाम मंत्री दिगंबर कामत, भलायकी मंत्री विश्वजीत राणे, महसूल मंत्री बाबूश मोन्सेरात, पंचायत मंत्री मॉविन गुदिन्हो, आमदार निलेश काब्राल, आमदार आलेक्स सिक्वेरा, आमदार जेनिफर मोन्सेरात हे बसकेक हाजीर नाशिल्ले. मंत्री दिगंबर कामत हे विदेशांत आसात. मंत्री विश्वजीत राणे आनी मंत्री बाबूश मोन्सेरात हे गोंया भायर आसात. आलेक्स सिक्वेरा आनी जेनिफर मोन्सेरात भलायकेच्या कारणा खातीर बसकेक हाजीर रावूंक नात. ह्या सगल्यांनी बसकेक हाजीर रावप शक्य नाशिल्ल्याची कल्पना दिल्ली, अशी म्हायती प्रदेश भाजप अध्यक्ष दामू नायक हांणी दिली.

मगोन शिरोड्यां लुडबूड करची न्हय : सुभाष शिरोडकार

महाराष्ट्रवादी गोमंतक पक्षान शिरोड्यां कार्यालय उक्तें करून शिरोडें मतदारसंघांत लुडबूड करची न्हय. मगोन शिरोड्यां कार्यालय उक्तें केलें जाल्यार आपल्याक मडकय कार्यालय उक्तें करचें पडटलें. मगोन युतीच्या धर्माक पाळो दिवन एक तर शिरोड्यांतली लुडबूड बंद करची वा सरकारातल्यान भायर सरचें, अशें मत उदका पुरवण खात्याचे मंत्री सुभाष शिरोडकार हांणी बसकेंत उक्तायलें. मगोचे सुदिन ढवळीकार हांणी मात हाचेर कसलीच प्रतिक्रिया उक्तावंक ना.