भांगरभूंय | प्रतिनिधी
दुचाकीक धपको, एकलो गंभीर जखमी
भांगरभूंय । प्रतिनिधी
म्हापशें : शिवोले रेंट अ कॅब थार जिपीन दुचाकीक धपको दिलो. ह्या अपघातांत एकल्याक मरण आयलें जाल्यार 14 वर्सां पिरायेचो भुरगो गंभीर जखमी जालो.
चड म्हायती प्रमाण, सकाळीं सुमार 6 वरांचेर शिवोली मार्नाच्या फर्नांडीसवाड्यार थारीन एके दुचाकीक नेटान धपको दिलो. हातूंत दुचाकी चलोवपी संकेत सूर्यकांत दाभोळकार(34. रा. दांडा, शिवोली) हाका सुवातेचेरूच मरण आयलें, जाल्यार ताचे वांगडा आशिल्लो निश्चल मोरजकार (14. रा. हणजुणें) हो भुरगो गंभीर जखमी जालो. ताचेर सध्या जीएमसींत उपचार चलतात.
हणजुणें पुलिसांनी दिल्ले म्हायती प्रमाण, मूळ केरळाचो दुबावीत थार ड्रायव्हर व्हाय कृष्णन हो थार जिपीन (जीए 03 झॅड 8100) चोपड्यां सावन दांडाचे दिशेन वतालो. जाल्यार संकेत दाभोळकार मोटरसायकली (जीए 03 जे 1332) वयल्यान फुडल्यान येतालो. थार जिपीन हे मोटारसायकलीक नेटान धपको दिलो. ह्या धपक्यान संकेताक सुवातेचेरूच मरण आयलें. जाल्यार निश्चल गंभीर जखमी जालो. हे घडणुकेची म्हायती मेळटकच पुलिसांनी घडणूक सुवातेर वचून पंचनामो केलो आनी दुबावीत थार ड्रायव्हराक ताब्यांत घेतलो.
हुस्क्याची गजाल म्हणल्यार फाटल्या तीन दिसांत गोंयांत थार जिपीचो हो दुसरो भिरांकूळ अपघात. हाचे आदीं मडगांवच्या शिर्ली वाठारांत धोफरायत वचपी थार जिपीन स्कुटरी वयल्यान वचपी बायलेक धरको दिल्लो. तातूंत ती गंभीर जखमी जाल्ली. सध्या तिचेर जीएमसींत उपचार चलतात. ह्या प्रकरणांत महाराष्ट्रांतल्या दुबाविताक गोंय पुलिसांनी अटक करून ताचेर खून करपाचो यत्न केल्ल्याचो गुन्यांव नोंद केलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
