भांगरभूंय | प्रतिनिधी
कॅ. विरियातो फर्नांडीसः केप्यां कार्यकर्त्यांची बसका
भांगरभूंय । प्रतिनिधी
केपें: जनमत कौल जावंक नाशिल्लो जाल्यार आयज स्वतंत्र गोंय उरचें नाशिल्लें. आयज परतून जनमत कौलाची गरज आसा, अशें काँग्रेसीचे दक्षीण गोंय उमेदवार कॅप्टन विरियातो फर्नांडीस हांणी सांगलें. केप्यां काँग्रेस कार्यकर्त्यांचे बसकेंत ते उलयताले.
ह्या वेळार विरोधी पक्ष फुडारी युरी आलेमांव, आमदार एल्टन डिकॉस्टा, सरपंच गोविंद फळदेसाय, नगरसेविका आलिन्डा लासेन्डा, जाकिना, लुर्डस फर्नांडीस, आदले नगराध्यक्ष राहूल परेरा, तेरेसा त्रावासो, आदले सरपंच दत्ता वेळीप, अवधूत आमोणकार, जोयल, आनराडे, प्रशांत वेळीर, किशोर नायक, अॅड. जॉन फर्नांडीस आनी हेर मानेस्त हाजीर आशिल्ले.
गोंयांतले मूळ आनी 6 हजार वर्सां रावन रावपी लोकांक आयज एसटी समाज म्हणटात. तांकां आपल्या हक्का खातीर रस्त्याचेर देंवचे पडटा. काँग्रेस पक्ष तांकां न्याय दितलो. आयज दरेका गोंयकाराच्या माथ्यार अडेज लाख रुपयांचें रीण आसा, जाल्यार सरकाराचेर 35 हजार कोटी रीण आसा, अशें विरियातो हांणी सांगलें.
गोंयांत आयज अन्याय, हुकूमशाय वाडत आसा. गोंय राखप ही आमची लागणूक. जे पद्दतीन गोंयच्यो जमनी विकतात, घुंवळी वखदां आनी रोजगार अशे साबार प्रस्न सतायतात. सगळे पक्ष एकठांय आयल्यात ते गोंयच्या हिता खातीर. भाजप हो ‘यूज आनी थ्रो’ करपी पक्ष. काँग्रेस पक्षाचीं सगळीं बँक खातीं सीज केल्यांत. तशेंच ईडी, सीआयडीचो हावको दाखोवन भेश्टोवपाचो यत्न चल्ला, अशें विरोधी पक्ष फुडारी युरी आलेमांव हांणी सांगलें.
काँग्रेस पक्ष सुवार्थी न्हय. देशहिताचो विचार करून काँग्रेसीन सगळ्यांक वांगडा घेतल्यात. कॅप्टन विरियातो हांणी 27 वर्सां देशा खातीर काम केलां. कारगील झुजांत वांटो घेतलो. हे खेपेची वेंचणूक ही देशाच्या हिता खातीर आसा. केपेंकार स्वाभिमानी आसात. विरियातोक ते 8 हजार मतांची आघाडी दितले. केपेंकार पयशांक बळी पडचे नात. रेल्वेचें दोट्टीकरण, कोळसो आनी हेर प्रस्न सुटावे करचे खातीर काँग्रेसीच्या उमेदवाराक तेंको दियात, अशें आमदार एल्टन डिकॉस्टा हांणी सांगलें.
अवधूत आमोणकार हांणी सुत्रसंचालन केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
