भांगरभूंय | प्रतिनिधी
कोलकाता, खबरां संस्था : च्या हें भारतीयांचें जिवीत. लाखांनी लोकांक सकाळीं उठताच च्या जाय पडटा. खरें म्हणल्यार तांचो दीस ताचे बगर वचना. भारतांत च्या पियेवपी लोकांचो आंकडो दुपेटीन वाडत आसतना एक धक्को दिवपी म्हायती उजवाडाक आयल्या. च्या म्हारग जातली! उत्तर बंगालांतलो च्या उद्देग खर संकश्टांतल्यान वता आनी ह्या वाठारांतल्यो जायत्यो बागो बंद जाल्यात अशें टी असोसिएशन ऑफ इंडिया हे च्या उत्पादकांचे संघटणेन सांगलें.
ऑक्टोबर २०२३ त उत्तर बंगालांत १३- १४ च्याच्यो बागो बंद जाल्यो आनी ११,००० परस चड लोकांचेर ताचो परिणाम जालो. च्या बाग बंद केल्यार च्या उत्पादनाचेर परिणाम जातलो आनी येवपी गिमांत च्या पानांचें दर वाडटलें अशें जाणकार सांगतात.
अस्तंत बंगाल सरकारान अंदूं एप्रिलांत जाहीर केल्ल्या अंतरीम वेतन वाडीक लागून संघटीत आनी ल्हान च्या कारखान्यां वांगडा सुमार ३०० बागांक अर्थीक संकश्टाचो सामनो करचो लागता. ह्या वाठारांत दरवर्सा सुमार ४० कोटी किलोग्रॅम च्याचें उत्पादन जाता. उद्देगाक सारें, कोळसो आनी रसायनांक लागून उत्पादन खर्चांत अचकीत वाड जाता. तशेंच पावणेंत सामके उणे दर मेळटात. असोसिएशनान अशेंय म्हणलां, अर्थीक संकश्ट उणें करपा खातीर उद्देगान पश्चीम बंगाल सरकारा पयलींच चर्चा केल्या. पूण सध्या हाचेर कांयच तोडगो येवंक ना.
फुडल्या वर्साच्या ६ म्हयन्यांनी बरें पीक येवचे खातीर सरकारान सगळ्यो बागो आनी कारखाने बंद करपाचे आदेश टीआय मंडळान दिल्यात.
१) जिलिंग, सिक्किम, हिमाचल प्रदेश आनी उत्तराखंडांतल्या सगळ्या च्या कारखान्यांक पाचवीं पानां कापपाची वा एकठांय करपाची निमाणी तारीख ११ डिसेंबर थारायल्या.
२) २३ डिसेंबर ही अस्तंत बंगाल आनी बिहारांतल्या डुअर्स आणि तराई प्रदेशाची तारीख जावन आसा. दार्जिलिंग, सिक्किम, हिमाचल प्रदेश आनी उत्तराखंडांतल्या कारखान्यांत पाचव्या पानांचेर प्रक्रिया करपाची निमाणी तारीख १३ डिसेंबर जाल्यार तराई, डूअर्स आनी बिहार खातीर २६ डिसेंबर.
३) दार्जिलिंग, सिक्किम, हिमाचल प्रदेश आनी उत्तराखंड खातीर अधिसुचीत स्टोरेज वाठारांत बिल मार्किंगा सयत पॅक केल्ली च्या वर्गीकरण, पॅकिंग आनी घेवपाची निमाणी तारीख २६ डिसेंबर आसतली अशें आदेशांत म्हणलां.
४) अस्तंत बंगाल आनी बिहारांतल्या डुआर्स आनी तराई वाठारांनी सीटीसी जातीं खातीर ६ जानेवारी २०२४ आनी ग्रीन टीच्या जातीं खातीर ११ जानेवारी २०२४ तारीख निश्चीत थारायल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
