भांगरभूंय | प्रतिनिधी
मुंबय, खबरां संस्था : वाडपी प्रदुशणाचो धोको मतींत घेवन सर्वोच्च न्यायालयान अंदूं फकत पर्यावरणाक अनुकूल अशे पाचवे माराण (ग्रीन क्रॅकर्स) मारपाचो निर्देश दिला. केंद्र सरकार ‘नीरी’ प्रमाणीत पाचव्या माराणांचो, फोगाचो सेगीत प्रचार करता. पूण परंपरीक आसूं वा पाचवे माराण दोनूय प्रकारांनी हवेचें आनी आवाजाचें प्रदूशण जाता.
केंद्रीय प्रदूशण नियंत्रण मंडळाच्या नेमांक आनी आवाज प्रदुशण नेम, २००० प्रमाण उद्देगीक वाठारांनी आवाजाची मर्यादा ७० डेसिबल, वेपारी वाठारांनी ५५ डेसिबल, निवासी वाठारांनी ४५ डेसिबल आनी निश्क्रीय वाठारांनी ४० डेसिबल अशी आसा. परंपरीक माराण्यांनी सरासरी १६५ डेसिबल आवाज येता जाल्यार पाचव्या माराणांचो ११० ते १२५ डेसिबल आवाज येता. ते पाचवे आसले तरी तांचो आवाज सरकाराच्या मर्यादे भायर आसा, असो दावो मुंबयतले पर्यावरण शिक्षण, संशोधन आनी जागृताय केंद्राची संशोधक गौरी कुलकर्णी करता.
परंपरीक माराणां परस पाचव्या मराण्यांक लागून प्रदुशण ३० टक्क्यां मेरेन उणें जाता. २०१५ वर्सा सर्वोच्च न्यायालयान माराण विकपाचेर बंदी घाल्ली. ह्या आदेशा उपरांत नागपूरांतल्या राष्ट्रीय पर्यावरण अभियांत्रिकी संशोधन संस्था आनी केंद्रीय पर्यावरण मंत्रालयान उण्या प्रदुशणाचे माराण तयार करपाचें काम सुरू केलें. २०१९ वर्सा ताचें सूत्र तयार जालें आनी ताका ‘ग्रीन क्रॅकर्स’ हें नांव दिलें.
‘नीरी’ कच्च्या मालाचेर चांचण्यो करता. प्रदुशण नियंत्रण मंडळाच्या अधिकार्यांच्या हाजेरेंत आवाज आनी हवेची चांचणी करता. पूण हें सगळें आसून लेगीत हे माराण खरेंच पर्यावरणाक अनुकूल नात. मंडळाच्या नेमा प्रमाण पीएम २.५ ची मर्यादा दर घन मिटराक ४० मायक्रोग्राम आनी पीएम १० ची मर्यादा दर घन मिटराक ६० मायक्रोग्राम आसा. संवसारीक भलायकी संघटणेची मर्यादा अनुक्रमान दर घनमीटराक ५ आनी १५ मायक्रोग्राम आसा. परंपरीक भट्ट्यांनी दर घनमीटराक ५००० मायक्रोग्राम पीएम २.५ कण भायर सरतात. ३० टक्क्यांनी उणो केलो तरी ह्या माराणांक लागून धोको आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
