भांगरभूंय | प्रतिनिधी
केंद्रीय राज्यमंत्री भानु प्रताप सिंग वर्मा हांची म्हायती
पणजी, पिनाक कल्लोळी ः गोंयांतल्या वट्ट नोंदणीकृत सूक्ष्म, ल्हान आनी मध्यम उद्देगां मदीं (एमएसएमई) 28.69 टक्के एमएसएमई बायलां कडेन आसात. एमएसएमईचे केंद्रीय राज्यमंत्री भानु प्रताप सिंग वर्मा हांणी ही म्हायती संसदेंत लेखी जापांतल्यान दिली. मार्च 2023 वर्सा बायलां कडेन आशिल्ल्या एमएसएमईचें प्रमाण 22.09 टक्के आशिल्लें. ह्या 9 म्हयन्यांत तातूंत 6.6 टक्क्यांनी वाड जाल्या.
मार्च 2023 मेरेन राज्यांतल्या 29 हजार 769 एमएसएमईंतल्यान 6 हजार 578 एमएसएमई बायलां कडेन आशिल्ले. देखून डिसेंबर 2023 मेरेन 48 हजार 715 एमएसएमईची नोंद जाली. हातूंतले 13 हजार 981 एमएसएमई बायलां कडेन आसात. देशाचे तुळेंत अस्तंत बंगालांत बायलांचे मालकीचे 1 लाखां परस चड एमएसएमई आसात. जाल्यार सिक्किमांत उण्यांत उणें 3 हजार 611 एमएसएमई बायलांचें मालकीचे आसात.
मंत्री वर्मान दिल्ले दुसरे जापे प्रमाण, 2020 ते 2023 ह्या काळांत गोंयांत एमएसएमई क्षेत्रांत बायलांचें रोजगार प्रमाण 22.94 टक्के आसा. एमएसएमई खातीर राज्यांतल्या 2 लाख 63 हजार 682 लोकांक रोजगार उपलब्ध जालां. हातूंत 2 लाख 3 हजार 167 दादले आनी 60 हजार 515 बायलांचो आस्पाव आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
