भांगरभूंय | प्रतिनिधी
बेळगाव: चोर्ला घांट वाठारांत सोमारा मध्यानरातीं एक भिरांकूळ अपघात जालो. गोंयच्यान बेळगांवां येवपी एमएच-१०-सीएन-८४७७ नंबराची गाडी एका वोल्यार पावतांच सुमार २० फूट खोल देंगणांत कोसळ्ळी. उपरांत गाडयेक उजो लागिल्ल्यान ती पिरायेन लासली. ही घडणूक मंगळारा सकाळीं प्रवाशांक कळ्ळी.
कणकुंबी-चोर्ला मार्गार आशिल्ली चडटी आनी वोल्तार वाहनावेल्यान नियंत्रण सुटिल्ल्यान हो अपघात घडिल्ल्याची म्हायती मेळ्ळ्या. रातच्या वेळार चालकाचो दोळो लागला आसतलो अशी शक्यताय उक्तायल्या. नियंत्रण सुट्टांच गाडी वचून सरळ खोल देंगणांत कोसळ्ळी. उपरांत तिका उजो लागलो.
मंगळारा सकाळीं कांय प्रवाशांनी ही लाशिल्ली गाडी पळोवन घडणुकेची म्हायती दिली. मात गाडयेंत नेमके कोण आशिल्ले, वाहन खंयच्यान गेल्ली आनी अपघाता वेळार कितले जाण प्रवास करताले, हे विशीं आजूनय स्पश्ट जावंक ना. घडणुके सुवातेर कोणूच दिसूंक ना. अपघाता वेळार चालक आनी हेरांनी थंयच्यान भायर सरून सुरक्षीत सुवातेर गेले आसतले, असो अदमास आसा. हे घडणुके उपरांत ह्या वाठारांत चिंतेचें वातावरण आसा. पुलीस फुडलो तपास करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
