भांगरभूंय | प्रतिनिधी
पणजी : गोंयांत २०२२-२३ ह्या सर्थीक वर्सा वट्ट ३८ हजार कोटी रुपयांचो डिजिटल आर्थीक वेव्हार जाला. राज्यांत वट्ट २० कोटी १७ लाख डिजिटल ट्रांजेक्शन जालां. केंद्रीय आयटी राज्यमंत्री राजीव चंद्रशेखर हांणी बुधवारा संसदेंत ही म्हायती दिली. हे विशीं खासदार पी. व्ही. रेड्डी हांणी प्रस्न विचारिल्लो.
राज्यांत डिजिटल आर्थीक वेव्हारांत वाड जायत आसा. २०१८-१९त १.५२ कोटी ट्रांजेक्शना वरवीं ५ हजार कोटी रुपया, जाल्यार २०१९-२० त ३.२६ कोटी ट्रांजेक्शना वरवीं ९ हजार कोटी रुपयांचो डिजिटल वेव्हार जाला. २०२०-२१त ५.३३ कोटी ट्रांजेक्शनांतल्यान १३ हजार कोटी रुपया आनी २०२१-२२ त११.३१ कोटी ट्रांजेक्शनांतल्यान २४ हजार कोटी रुपयांचो डिजिटल वेव्हार जाला.
भीम युपीआय, रू पे कार्ड, आयएमपीएस आनी यूएसएसडी ह्या सगळ्यांचो डिजिटल व्यवहारांत आस्पाव आसा. फाटल्या कांय वर्सांनी डिजिटल पेमेंट वेव्हार वाडल्यात. डिजिटल पेमेंट सोपो आशिल्ल्यान लोक हो वेव्हार करपाक चड पसंती दितात.
मजगतीं, ह्या चार वर्सांनी डिजिटल पेमेंटांत आठ पटीनी वाड जाल्या. २०१८-१९त ५ हजार कोटी रुपयांचो डिजिटल वेव्हार जाल्लो. २०२२-२३त तो वाडून ३८ कोटी रुपयांचेर पावला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
